Suedia kalon në patente digjitale nga viti 2030, gjithçka që duhet të dini.

Duke filluar nga viti 2030, Suedia do të prezantojë patentat digjitale si pjesë e direktivës së re të Bashkimit Evropian për lejet e drejtimit. Kjo do të thotë se qytetarët do të mund të tregojnë patentën e tyre përmes një aplikacioni në telefonin e tyre.

Sipas Pär-Ola Skarviken, hetues në Transportstyrelsen (Agjencia Suedeze e Transportit), nuk do të hiqet plotësisht versioni i zakonshëm i patentës.

“Nuk do të kemi vetëm patentë digjitale në të ardhmen, njerëzit do të mund të zgjedhin mes versionit digjital dhe atij fizik,” thotë Skarviken.

Një nga ndryshimet kryesore me patentën digjitale është se të dhënat përditësohen automatikisht. Kjo ndodh sa herë që bëhen ndryshime në regjistrin e trafikut rrugor, për shembull kur rinovohet patenta ose revokohet nga autoritetet.

Megjithatë, krahas përparësive, ka edhe disa mangësi. Një nga to është përjashtimi digjital, që prek personat që nuk kanë smartphone ose nuk përdorin aplikacione.

“Je i detyruar të kesh një telefon inteligjent ose një mënyrë tjetër për të treguar informacionin,” shpjegon Skarviken.

Një nga arsyet pse Suedia ka shtyrë përpara këtë projekt është zhvillimi i shpejtë digjital në shoqëri.

“Qëllimi është të përshtatemi me normat e sotme dhe me mënyrën se si funksionon shoqëria moderne,” shton ai.

Kështu do të funksionojë patenta digjitale:

• Pasi aplikacioni të jetë gati, shkarkohet në telefon.
• Hyrja bëhet me BankID, sistemin suedez të identifikimit digjital.
• Brenda aplikacionit do të shfaqet versioni digjital i patentës suedeze së bashku me një kod QR.
• Policia ose kontrollorët mund ta skenojnë kodin QR për të verifikuar patentën në kohë reale.
• Të dhënat përditësohen automatikisht sa herë që Transportstyrelsen bën ndryshime në regjistrin e trafikut, si në rast rinovimi apo revokimi të patentës.

Burimi: Transportstyrelsen