Bora po i afrohet Göteborgut, koha për gomat e dimrit.

Moti i ftohtë po përhapet në të gjithë Suedinë dhe qyteti i Göteborgut mund të marrë reshjet e para të borës javën e ardhshme. Lajmin e raporton gazeta Göteborgs-Posten (GP).

Sipas meteorologes së SMHI, Sandra Fyrstedt, parashikimi është ende i pasigurt.

“Do të shohim nëse bora do të vijë që tani, por një gjë është e sigurt: është koha për të menduar për gomat e dimrit”, tha ajo për gazetën.

Bora e parë ka rënë tashmë në pjesët veriore të vendit. Meteorologët suedezë kanë paralajmëruar gjatë kësaj jave se mund të ketë reshje bore edhe në Svealand dhe Götaland gjatë fundjavës.