Frederiksen: Drejtorët duhet të kenë të drejtë të përjashtojnë nxënësit e dhunshëm

Kryeministrja e Danimarkës, Mette Frederiksen, ka propozuar që drejtorët e shkollave të kenë të drejtën të përjashtojnë vetë nxënësit e dhunshëm në klasat e larta të shkollës fillore, pa pasur nevojë për miratimin e komunës.

Në një intervistë për gazetën Berlingske, Frederiksen tha se është e domosdoshme që shkollat të vendosin kufij të qartë ndaj sjelljeve të dhunshme.

“Nëse shkolla fillore nuk vendos kufij për këtë sjellje, shoqëria jonë nuk mund të qëndrojë e bashkuar në të ardhmen. Është kaq e thjeshtë,” tha ajo.

Sipas rregullave aktuale në Danimarkë, drejtorët duhet të marrin lejen e komunës për të përjashtuar një nxënës. Por Frederiksen dëshiron që ata të kenë të drejtë të marrin vetë këtë vendim dhe të përjashtojnë nxënësit e klasave 7 deri në 9 për një periudhë deri në 50 ditë, si dhe t’u ndalojnë atyre rikthimin në shkollë.

Kryeministrja theksoi se kjo masë nuk do të zbatohet për fëmijët me diagnoza, por për “të rinjtë” që kryejnë veprime që, jashtë shkollës, do të konsideroheshin si krime.