Të gjithë përdoruesit e internetit, ndryshoni fjalëkalimet tuaja

Ka ndodhur rrjedhja më e madhe e fjalëkalimeve në historinë e internetit. Sipas raportimeve, janë publikuar rreth 1,3 miliardë fjalëkalime një shifër marramendëse. TV4 njofton se kushdo që ka qenë “aktiv në internet gjatë dhjetë viteve të fundit” ka një rrezik të madh të jetë prekur nga kjo rrjedhje, që praktikisht mund të përfshijë pothuajse të gjithë popullsinë suedeze.

Eksperti i internetit Måns Jonasson i bën thirrje të gjithëve të fillojnë të përdorin një menaxher fjalëkalimesh. Ai shpjegon se një menaxher krijon dhe ruan fjalëkalime të gjata dhe unike të vështira për t’u thyer dhe se përdoruesi duhet të mbajë mend vetëm një fjalëkalim: atë të menaxherit.

“S’do të jetë vetëm më i sigurt, por edhe pak më i lehtë. Unë rekomandoj të gjithë të marrin veten dhe ta provojnë menjëherë,” tha Jonasson për TV4.

Rrjedhjet e fjalëkalimeve janë bërë më të shpeshta vitet e fundit. Në fund të tetorit, eksperti australian Troy Hunt zbuloi se 183 milionë adresa unike Gmail ishin prekur. Graham Cluley, ekspert i sigurisë, paralajmëroi seriozitetin e incidentit, veçanërisht sepse fjalëkalimet e lidhura me të njëjtën adresë e-mail (p.sh. për Netflix) mund të jenë gjithashtu në rrezik. “Me 183 milionë adresa emaili të ekspozuara, shumë njerëz mund të përfshihen pa e ditur që pajisjet e tyre janë komprometuar,” tha Cluley për Daily Mail.

Måns Jonasson thekson se për llogaritë e Gmail dhe ofrues të tjerë emaili duhet përdorur fjalëkalime unikë që nuk përdoren askund tjetër. Ai paralajmëron se nëse jeni prekur nga rrjedhja, nuk mjafton të ndryshoni thjesht një numër ose një simbol në fjalëkalimin ekzistues, duhet të krijoni fjalëkalime të reja, të gjata dhe unike për secilin shërbim. “Nëse ke fjalëkalime unike për çdo shërbim dhe nuk i ripërdor ato, je më mirë i mbrojtur se 99% e njerëzve,” tha Jonasson.

Përdoruesit mund të kontrollojnë nëse adresa e tyre e emailit është prekur në faqen Internetkunskap.