Propozimi për të shfuqizuar lejet e përhershme të qëndrimit. Video “Debati në parlament midis ministrit Johan Forssell (M) dhe Tony Haddou (V).

Qeveria suedeze ka paraqitur një propozim për të hequr lejet e përhershme të qëndrimit dhe për t’i zëvendësuar ato me leje vetëm të përkohshme. Për më tepër, qeveria ka sugjeruar që edhe lejet e përhershme tashmë të dhëna mund të kthehen retroaktivisht në leje të përkohshme. Ky ndryshim mund të prekë midis 98 000 dhe 180 000 personave, shumë prej të cilëve kanë jetuar në Suedi për më shumë se 10 vjet.

Kundër këtyre planeve ka reaguar deputeti Tony Haddou (V), i cili ka paraqitur një interpelacion drejtuar ministrit të migracionit Johan Forssell (M). Ai ngre shqetësime serioze për sigurinë juridike, të drejtat e njeriut dhe stabilitetin e jetës së mijëra njerëzve.

“Leja e përhershme është një premtim sigurie”

Sipas Haddou, leja e përhershme e qëndrimit nuk është thjesht një dokument, por një garanci që u mundëson njerëzve të ndërtojnë jetën e tyre pas arratisjes. Ai paralajmëron se rishikimi i këtyre lejeve mund të shkelë:

• të drejtën suedeze,
• të drejtën e Bashkimit Evropian,
• parimet e administratës që ndalojnë prishjen e vendimeve që favorizojnë individin pa arsye shumë të forta.

Shfuqizimi i lejeve ekzistuese të përhershme, sipas tij, mund të konsiderohet si ushtrim i padrejtë i pushtetit.

Pasojat për njerëzit: pasiguri, humbje e stabilitetit dhe frikë për të ardhmen

Shumë prej personave që mund të preken janë të integruar në shoqërinë suedeze kanë punë, fëmijë në shkollë, jetojnë në komunitete dhe kontribuojnë në shoqëri. Deputeti thotë se propozimi krijon pasiguri të madhe dhe rrezikon të dëmtojë besimin e njerëzve tek shteti dhe drejtësia.

Ai thekson se shumë njerëz që kanë bërë “çdo gjë siç duhet” mund të përballen papritur me rreziqet e dëbimit ose humbjes së të drejtës për të qëndruar.

Qeveria thotë se kjo i motivon njerëzit të marrin shtetësinë por jo të gjithë kanë mundësi të barabarta

Qeveria argumenton se heqja e lejeve të përhershme do t’i motivojë njerëzit të kërkojnë shtetësinë suedeze. Por deputeti Haddou kritikon këtë argument duke thënë se jo të gjithë kanë të njëjtat mundësi për të përmbushur kërkesat për shtetësi, si:

• testet e gjuhës,
• dokumentet e identitetit,
• kërkesat për të ardhura.

Ai thotë se disa persona përballen me pengesa të pashmangshme, për shkak të moshës, sëmundjeve, aftësive të kufizuara ose mungesës së dokumenteve nga vendet e tyre të origjinës.

Fëmijët mund të goditen më rëndë

Deputeti i kujton qeverisë se Suedia është kritikuar tashmë nga OKB-ja për mënyrën si trajton fëmijët në procesin e azilit. Tani, duke krijuar edhe më shumë pasiguri, Suedia rrezikon të shkelë Konventën për të Drejtat e Fëmijës, e cila është ligj kombëtar.

Pesë pyetjet që deputeti kërkon t’i përgjigjet ministri i migracionit

Në interpelacionin e tij, Haddou i kërkon ministrit Forssell të shpjegojë:

1. A është e ligjshme që lejet e përhershme të shfuqizohen retroaktivisht?
2. Çfarë analize juridike ka bërë qeveria për këtë propozim?
3. Si do të mbrohen grupet më të cenueshme të moshuarit, personat me aftësi të kufizuara dhe fëmijët?
4. Si është marrë parasysh interesi më i mirë i fëmijëve, sipas Konventës së të Drejtave të Fëmijës?
5. Çfarë masash do ndërmarrë qeveria për të shmangur pasigurinë e mijëra personave që kanë jetuar gjatë në Suedi?

Burimi: Rigsdagen.se

Klikoni në Link për të parë debatin e plotë ⬇️

https://www.riksdagen.se/sv/webb-tv/video/interpellationsdebatt/forslag-att-avskaffa-permanenta-uppehallstillstand_hd1061/?pos=484&autoplay=true