Jetesa me qira po bëhet gjithnjë e më e shtrenjtë

Tani është e konfirmuar: të jetosh në një banesë me qira kushton më shumë sesa të jetosh në një banesë në pronësi. Këtë e tregojnë statistikat më të fundit nga SCB.

Sipas të dhënave të vitit të kaluar, familjet suedeze shpenzuan mesatarisht 23% të të ardhurave të tyre të disponueshme për banimin.

Por për ata që jetojnë me qira, shifra është edhe më e lartë 27%.

Në krahasim, familjet që jetojnë në apartamente të blera shpenzojnë 21%, ndërsa ata që jetojnë në shtëpi të tyre paguajnë rreth 18% të të ardhurave për shpenzimet e banesës.

“Tregu i banesave është në thelb i padrejtë”

Shoqata e Qiramarrësve ka reaguar fuqishëm ndaj këtyre shifrave të reja.

Kryeekonomisti i saj, Martin Hofverberg, thotë:

Këto të dhëna tregojnë qartë se tregu i banesave është i padrejtë në thelb. Qiramarrësit çdo vit paguajnë pjesën më të madhe të të ardhurave të tyre për banesën. Ndërkohë, ata që e zotërojnë banesën përfitojnë subvencione të mëdha tatimore, gjë që qiramarrësit nuk e kanë.

Ai paralajmëron se rritja e kostove po dëmton gjithnjë e më shumë familjet:

“Kur çmimet rriten, familjeve u shkurtohen hapësirat financiare dhe qiramarrësit janë më të goditurit”.

Prindërit e vetëm më të prekurit

Sipas Hofverberg, situata është edhe më e rëndë për prindërit e vetëm që jetojnë me qira.

Matjet e mëparshme tregojnë se më shumë se një e treta e të ardhurave të tyre shkon vetëm për të paguar qiranë.

Ai shton:

“Kriza e kostos së jetesës vazhdon t’i godasë rëndë familjet, sidomos qiramarrësit. Qiratë që u rritën për shkak të kostove të përkohshme të pronarëve të ndërtesave nuk bien më asnjëherë. Ndryshe nga ata me kredi, të cilëve u ulen pagesat kur interesat zbresin”.

Faktet: Rritja e qirave në 10 vitet e fundit (në gjithë vëndin)

Rritja e qirasë ka qenë:

• 4,6% në vitin 2025

• 5,0% në vitin 2024

• 4,1% në vitin 2023

• 1,7% në vitin 2022

• 1,4% në vitin 2021

• 1,9% në vitin 2020

• 1,9% në vitin 2019

• 1,1% në vitin 2018

• 0,8% në vitin 2017

• 0,8% në vitin 2016

Burimi: SCB