Mette Frederiksen: Nuk do të jap dorëheqjen pas humbjes në zgjedhjet lokale

Kryeministrja e Danimarkës dhe udhëheqësja e Socialdemokratëve, Mette Frederiksen, ka deklaruar se nuk ka ndërmend të japë dorëheqjen pas humbjes së partisë së saj në zgjedhjet lokale të mbajtura të martën. Ajo e tha këtë në një intervistë për TV2.

“Është e vërtetë që kemi shënuar rënie në këto zgjedhje komunale, por në zgjedhjet e fundit parlamentare ne u rritëm. Nuk kam asnjë plan të largohem,” u shpreh Frederiksen.

Në Kopenhagen, qytet ku Socialdemokratët kanë pasur pushtetin për mbi 100 vjet, partia pësoi një rënie të madhe dhe dje pranoi zyrtarisht humbjen. Kjo është hera e dytë radhazi që partia del dobët në zgjedhje, pasi edhe zgjedhjet për Parlamentin Europian vitin e kaluar rezultuan një zhgënjim për Socialdemokratët.