Rregulla të reja për qiratë hyresrätter nga 1 janari. Ja si do t’ju ndikojnë?

Tregu i qirasë në Suedi do të ndryshojë nga 1 janari 2026, dhe këto ndryshime do të ndikojnë si qiramarrësit ashtu edhe pronarët e banesave. Rregullat e reja prekin sidomos qiratë e quajtura presumtionshyror, që përdoren për banesat e reja ose ato të rindërtuara.

Parlamenti suedez ka vendosur që nga viti 2026 këto qira do të marrin rritje vjetore njësoj si qiratë e zakonshme. Kjo pritet të ndryshojë mënyrën se si caktohen qiratë e reja dhe se si rriten ato nga viti në vit. Qëllimi është që sistemi të bëhet më i qartë dhe më i parashikueshëm, por ende ka pikëpyetje për efektin që do të ketë te ndërtimi i banesave të reja.

Çfarë ndryshon me rregullat e reja?

Nga 1 janari 2026:

• Qiratë e tipit presumtionshyra do të rriten çdo vit sipas rritjes së përgjithshme të qirave në zonë. Deri tani, në shumë raste këto qira janë rritur më pak.
• Vendimet e mëparshme të gjykatave, që jepnin rritje më të ulëta për këto qira, nuk do të kenë peshë.
• Mosmarrëveshjet për qiratë fillestare mund të zgjidhen nga një arbitër i posaçëm, nëse palët bien dakord.
• Qiramarrësi dhe pronari mund të bien dakord për shtesa që ndikojnë në qira, si instalimi i paneleve diellore apo përmirësime të tjera teknike.

Johan Kleveland nga Shoqata e Pronarëve të Pasurive e sheh këtë si hap pozitiv, sepse sipas tij është bërë shumë e vështirë të negociohen qirat që e bëjnë të mundur ndërtimin e një pallati të ri. Megjithatë, ai thotë se rregullat e reja nuk mjaftojnë për të rritur ndërtimin e banesave të reja dhe se duhet një reformë më e madhe për qiratë në ndërtimet e reja.

Çfarë është “presumtionshyra”?

• Një qira e veçantë për banesa të reja ose të rindërtuara.
• Caktohet me marrëveshje midis pronarit dhe një organizate të qiramarrësve.
• Deri në 15 vjet nuk krahasohet me sistemin e zakonshëm të vlerës përdoruese.
• Pas 15 vjetësh mund të rishikohet sipas rregullave normale.
• Qëllimi është që pronarët të kenë të ardhura më të sigurta dhe të ndërtojnë më shumë banesa.

Burimi: Gjykatat e Suedisë

Hyresgästföreningen është kritike: “Ndryshimet janë të çuditshme”

Shoqata e Qiramarrësve nuk është dakord me një pjesë të ligjit, sidomos me faktin që ai do të ketë efekt edhe për banesat që janë ndërtuar tashmë. Juristi Niclas Sundell thotë se pronarët kanë ndërtuar duke u bazuar te rregullat e vjetra dhe se është e pazakontë të ndryshohen rregullat “mbrapsht”.

Sipas tij, qëllimi është që të rritet ndërtimi i banesave të reja, por efekti është i vogël nëse përfshihen edhe shtëpitë e vjetra. Ai shton se ende nuk dihet nëse rregullat e reja do të sjellin ndërtim të ri, sepse sipas Shoqatës së Qiramarrësve duhen stimuj të tjerë për të krijuar banesa që njerëzit mund t’i përballojnë.

A do të rriten qiratë?

Ka shumë të ngjarë që qiratë e këtij lloji të rriten më shumë në të ardhmen, sepse deri tani janë rritur më pak se qiratë e zakonshme. Sundell thotë se rritjet më të larta nuk do të aplikohen automatikisht, por do të varen nga negociatat.

Ai paralajmëron edhe për rrezikun që arbitrat mund të vendosin rritje më të larta, sepse sipas tij në të kaluarën ata kanë dhënë rritje më të mëdha se sa negociatat normale.

Ndikimi i vërtetë pritet të shihet në negociatat e fillimit të vitit të ardhshëm. Për qiratë më të vjetra të këtij lloji, mund të krahasohet se sa më pak do të ishte rritja po të mos ishte miratuar ligji i ri.

Rregullat e reja – pika kryesore

• Kur hyjnë në fuqi? – 1 janar 2026

• Më shumë mundësi për rritje vjetore – Qiratë rriten sipas zhvillimit të qirave në zonë, përveç rasteve kur ka arsye të veçanta.

• Zgjidhje e re e mosmarrëveshjeve – Palët mund të zgjedhin një arbitër të posaçëm.

• Shtesa dhe heqje elementesh – Qira ndryshon nëse qiramarrësi shton ose heq opsione në banesë.

• Modernizime të mëdha – Qira mund të rritet nëse bëhen përmirësime me rëndësi në ndërtesë.

• Vlen edhe për kontratat ekzistuese – Përjashtohen vetëm rastet që tashmë janë në proces në komisionin e qirave.

Burimi: Parlamenti Suedez

Arrikulli nga: Nyheter24

link: https://nyheter24.se/nyheter/inrikes/1439398-nya-regler-for-hyresratter-infors-1-januari-sa-paverkas-du