Para të reja për pensionistët suedezë nga 1 janari 2026

Qeveria suedeze ka njoftuar ndryshime të reja që prekin të gjithë qytetarët mbi 65 vjeç. Këto ndryshime do të hyjnë në fuqi në fillim të vitit 2026 dhe lidhen me mënyrën se si shpërndahen fondet e Allmänna arvsfonden, një fond shtetëror që mbështet projekte për fëmijë, të rinj, të moshuar dhe persona me aftësi të kufizuara.

Deri tani ka ekzistuar një rregull që kufizonte shumën e parave që mund të përdoreshin për projekte për të moshuarit. Vetëm një e dhjeta e fondeve të shpërndara mund të shkonte për këtë grup.

Por nga 1 janari 2026, ky kufi hiqet plotësisht. Kjo do të thotë se të moshuarit do të mund të përfitojnë nga fondi në të njëjtën mënyrë si të gjitha grupet e tjera.

Ministri i çështjeve sociale, Jakob Forssmed (KD), thotë se mbështetja për të moshuarit ka qenë shumë më e ulët se për grupet e tjera. Sipas tij, ndryshimi i ligjit krijon barazi dhe i jep organizatave të shoqërisë civile mundësi më të mira për të zhvilluar projekte që u shërbejnë të moshuarve.

Çfarë është Allmänna arvsfonden?

• Fondi përdoret për të financuar projekte vullnetare për fëmijë, të rinj, të moshuar dhe persona me aftësi të kufizuara.
• U krijua në vitin 1928, kur parlamenti vendosi që kushërinjtë dhe të afërmit e largët të mos trashëgonin më.
• Trashëgimitë nga njerëzit pa pasardhës dhe pa testament shkojnë për qëllime të dobishme, jo për shtetin.
• Trashëgimitë e para në fond erdhën nga një rrobaqepëse, një endëse dhe një punëtor qyteti.
• Fillimisht fondi ndihmonte të rinjtë me vështirësi ekonomike për studime, si edhe familjet e mëdha me pak të ardhura.
• Në vitin 2024, fondi shpërndau 956 milionë korona.

Ndryshimi i ri ligjor pritet të rrisë ndjeshëm mundësitë që të moshuarit të përfitojnë nga këto para për projekte të ndryshme në komunitet.