Qeveria suedeze: mund të hiqet shtetësia e drejtuesve të bandave

Qeveria suedeze ka njoftuar propozime të reja për ndryshime në kushtetutë. Sipas tyre, personat me shtetësi të dyfishtë që kryejnë krime të rënda mund të humbasin shtetësinë suedeze. Kjo lidhet kryesisht me drejtues bandash që merren me veprimtari të dëmshme për shoqërinë.

Me propozimin e ri, qeveria shkon më larg se komiteti kushtetues. Aktualisht, shtetësia suedeze nuk mund të hiqet.

Qeveria propozon gjithashtu që të bëhet e dënueshme pjesëmarrja në banda kriminale, njësoj si pjesëmarrja në grupe terroriste. Këtë e konfirmoi ministri i drejtësisë, Gunnar Strömmer (M), gjatë konferencës për shtyp.

“Besojmë se këto masa janë të rëndësishme për të mbrojtur individët dhe për të forcuar aftësinë e shoqërisë për t’u mbrojtur nga ata që e kërcënojnë lirinë tonë,” deklaroi Strömmer.

Ndryshimet e propozuara pritet të hyjnë në fuqi në janar 2027.