Kritika të forta ndaj përdorimit të dioksidit të karbonit në therjen e derrave

Shumica e thertoreve në Suedi përdorin dioksid karboni për të mpirë derrat para therjes, shkruan Aftonbladet. Kjo metodë përdoret gjerësisht, edhe pse është kritikuar prej kohësh sepse shkakton panik dhe vuajtje të mëdha te kafshët.

Së fundmi, disa politikanë kanë reaguar ashpër dhe kërkojnë që kjo metodë të hiqet gradualisht ose të caktohet një datë e qartë për ndalimin e saj.

“Kjo është një nga pjesët më të neveritshme të industrisë së mishit që ende lejohet”, thotë Markus Wiechel nga partia Demokratët e Suedisë.

Edhe politikanë të tjerë ndajnë të njëjtin shqetësim. Deputetja e Liberalëve, Elin Nilsson, thotë se “nuk është e pranueshme që kafshët të vuajnë në këtë mënyrë”. Ndërsa Åsa Westlund nga Socialdemokratët shprehet se pamjet janë “të tmerrshme për t’u parë”.

Sipas ekspertëve, ekzistojnë metoda më të buta dhe më humane, si përdorimi i gazrave argon dhe helium. Megjithatë, rregullat suedeze për mbrojtjen e kafshëve lejojnë aktualisht vetëm mpirjen mekanike ose përdorimin e dioksidit të karbonit gjatë therjes.

Debati për mirëqenien e kafshëve tani po rritet dhe gjithnjë e më shumë zëra po kërkojnë ndryshim të ligjit.