Shqetësim i madh për Suedinë: Katër milionë banorë më pak deri në vitin 2100

Normat shumë të ulëta të lindshmërisë në Suedi mund të çojnë në një krizë serioze të shtetit të mirëqenies. Kjo thuhet në raportin e parë paraprak të një hetimi qeveritar mbi zhvillimin demografik të vendit.

Sipas hetueses Åsa Hansson, demografia ka një ndikim vendimtar në ekonominë e vendit.

“Demografia luan një rol kyç për Prodhimin e Brendshëm Bruto (PBB)”, tha ajo gjatë një konference për shtyp.

Raporti paralajmëron se, në skenarin më të keq, popullsia e Suedisë mund të bjerë me rreth katër milionë njerëz deri në vitin 2100. Një rënie e tillë do të kishte pasoja shumë të rënda ekonomike. Sipas Åsa Hansson, në këtë rast do të zhdukej më shumë se gjysma e PBB-së së vendit.

Ministri i Çështjeve Sociale, Jakob Forssmed (KD), thekson se pasojat e këtij zhvillimi po ndihen që tani dhe po ndryshojnë shoqërinë në mënyrë themelore. Ai paralajmëron se në të ardhmen mund të jetë shumë e vështirë të gjendet personel për sektorin e mirëqenies, si shëndetësia dhe kujdesi social. Po ashtu, sipas tij, mund të ulet edhe niveli dhe oferta e shërbimeve të mirëqenies.

“Fëmija, kur lind, është plotësisht i varur nga shoqëria përreth. Tani që po lindin gjithnjë e më pak fëmijë, bëhet e qartë se sa e varur është shoqëria nga fëmijët”, thotë Jakob Forssmed.

Raporti ngre alarmin se nëse trendi i ulët i lindshmërisë vazhdon, Suedia përballet me sfida të mëdha ekonomike dhe sociale në dekadat që vijnë.