Rregulla të reja për kreditë e banesave, ja çfarë pritet të ndryshojë?

Qeveria suedeze ka thirrur një konferencë për shtyp për të prezantuar rregulla të reja për kreditë e banesave, që pritet të hyjnë në fuqi më 1 prill 2026.

Të enjten, ministri i tregjeve financiare, Niklas Wykman (M), do të drejtojë konferencën ku do të flitet për një kërkesë të re për amortizim dhe një ndryshim të tavanit të kredisë për banesa.

Në konferencë do të jenë edhe:

• Andreas Carlson (KD), ministër i infrastrukturës dhe strehimit
• Dennis Dioukarev (SD), anëtar i Komisionit të Financave
• Cecilia Rönn (L), zëdhënëse për politikën ekonomike

Çfarë pritet të ndryshojë

• Kërkesa e parë për amortizim mbetet e njëjtë:
  • 1% amortizim për kredi që janë 50–70% e vlerës së banesës
  • 2% amortizim për kredi mbi 70% të vlerës së banesës
• Hiqet kërkesa shtesë për amortizim:
  Ky ishte rregull i vitit 2018 që i detyronte familjet me borxhe të larta (kredi mbi 4,5 herë të ardhurat vjetore) të amortizonin edhe 1% shtesë.
• Tavani i kredisë për banesa rritet nga 85% në 90%:
  Kjo do të thotë se blerësit nuk kanë nevojë të sjellin aq shumë para nga xhepi për të blerë një banesë. Ata mund të marrin më shumë kredi dhe të paguajnë më pak para në fillim.
• Kredia shtesë (tilläggbelåning) kufizohet në 80% të vlerës së banesës:
  Kjo vlen për raste si rinovime ose zgjerim i kredisë ekzistuese.
• Rivlerësimi i banesës do të lejohet vetëm një herë në pesë vjet:
  Kjo masë synon të ulet rreziku që njerëzit të marrin kredi shumë të larta për shkak të rritjeve të përkohshme të çmimeve.

Që më shumë njerëz të kenë shtëpinë e tyre

Qeveria thotë se qëllimi i këtyre ndryshimeve është që më shumë suedezë të kenë mundësi të blejnë dhe zotërojnë banesën e tyre.

Sipas Andreas Carlson (KD), ministri i infrastrukturës dhe strehimit:

“Ndryshimet e propozuara ulin pengesat për hyrje në tregun e banesave dhe ulin shpenzimet mujore për familjet suedeze. Në të njëjtën kohë, ruhet stabiliteti financiar duke kufizuar borxhin e tepërt.”

Kështu, të gjithë blerësit e banesave duhet të jenë të vetëdijshëm për këto ndryshime që do të ndikojnë se sa mund të marrin kredi dhe sa duhet të paguajnë çdo muaj.