Ligjet e reja që hyjnë në fuqi në Suedi: ndryshime për SFI, taksa dhe përfitime sociale

Me fillimin e vitit të ri, në mesnatë, në Suedi kanë hyrë në fuqi disa ligje të reja, raportojnë disa media. Ndryshimet prekin fusha të ndryshme, nga arsimi dhe taksat, te energjia, drejtësia dhe politikat sociale.

Një nga ndryshimet kryesore është rritja e ndihmës për rikthim në atdhe. Tani kjo ndihmë arrin në 350 000 korona për çdo të rritur dhe 25 000 korona për çdo fëmijë. Po ashtu, për të moshuarit bëhet më e lirë të shkojnë te dentisti, pasi kostot e trajtimit dentar ulen.

Sipas Dagens Samhälle, hyjnë në fuqi edhe rregulla të reja për studimet SFI. Arsimi për mësimin e gjuhës suedeze për emigrantët duhet të përfundojë brenda tre vjetësh. Në të njëjtën kohë, hiqet ndalimi për nxjerrjen e uraniumit, duke e bërë të mundur që në Suedi të jepen leje për hapjen e minierave.

Ndryshime të rëndësishme ka edhe në sistemin e drejtësisë. Rregullat për lirimin me kusht bëhen më të rrepta. Personat që janë dënuar me të paktën gjashtë vjet burg duhet tani të vuajnë tre të katërtat e dënimit para se të mund të lirohen.

Sipas SVT, rritet edhe niveli bazë pa taksë për llogaritë e kursimit ISK. Shuma rritet nga 150 000 korona në 300 000 korona. Gjithashtu, llotaritë e lidhura me partitë politike duhet të bëhen më të qarta dhe më transparente për qytetarët.

Gazeta Göteborgs-Posten shkruan se taksa e energjisë elektrike ulet në 36 ore për kilovat-orë, me qëllim që të lehtësohet elektrifikimi. Ndërkohë, rritet taksa për produktet e nikotinës dhe për lëngjet elektronike të cigareve. Qeveria prezanton gjithashtu një shpërblim pune për personat që kanë kaluar nga ndihma sociale në punë.

Ligjet e reja synojnë të ndikojnë drejtpërdrejt në jetën e përditshme të qytetarëve dhe të sjellin ndryshime në disa sektorë të rëndësishëm të shoqërisë.