Ryanair heq mbi 50 linja ajrore në Europë gjatë vitit 2026

Kompania ajrore me kosto të ulët Ryanair ka njoftuar shkurtime të mëdha në rrjetin e saj të fluturimeve në Europë. Gjatë vitit 2026, mbi 50 linja ajrore do të hiqen, si në sezonin dimëror ashtu edhe në atë veror. Ky vendim do të ndikojë shumë udhëtarë, përfshirë edhe udhëtarët nga Suedia që përdorin Ryanair për udhëtime të lira brenda Europës.

Sipas raportimit të Euronews, Ryanair po redukton ndjeshëm fluturimet për shkak të kostove të larta të aeroporteve, taksave të rritura dhe tarifave të shërbimeve ajrore në disa vende europiane.

Shkurtime të mëdha në Gjermani dhe Belgjikë

Në Gjermani, Ryanair do të heqë gjithsej 24 linja ajrore. Këto përfshijnë fluturime nga aeroporte të mëdha si Berlini, Hamburgu dhe Memmingen. Kompania thotë se tarifat e larta të aeroporteve dhe shërbimeve të kontrollit ajror e bëjnë të vështirë të ofrojë bileta të lira.

“Kostot e larta të operimit e bëjnë të pamundur që ne të jemi konkurrues, tha drejtori i marketingut i Ryanair, Dara Brady”, në një deklaratë zyrtare.

Në Belgjikë, Ryanair planifikon të heqë 20 linja ajrore duke filluar nga orari dimëror 2026/27. Arsyeja kryesore është rritja e fortë e taksës së fluturimeve. Kompania ka paralajmëruar se kjo taksë mund të çojë në rënie të trafikut ajror dhe turizmit në vend, nëse ajo nuk hiqet.

Spanja, Portugalia dhe Franca preken rëndë

Edhe disa vende të tjera evropiane do të ndihen fort nga këto shkurtime.

Në Spanjë, Ryanair do të ndalojë të gjitha fluturimet drejt dhe nga Asturias në veri të vendit dhe nga aeroporti verior i Tenerifes. Përveç kësaj, kapaciteti i fluturimeve në rajone të tjera spanjolle do të ulet ndjeshëm. Shkak për këtë janë mosmarrëveshjet me operatorin e aeroporteve Aena, për shkak të rritjes së taksave dhe tarifave aeroportuale, si dhe tarifat që Ryanair i quan “të paligjshme për bagazhet”, të vendosura nga qeveria spanjolle.

Në Portugali, Ryanair planifikon të heqë të gjitha gjashtë linjat ajrore drejt dhe nga Ishujt Azore. Sipas vlerësimeve, kjo do të prekë qindra mijëra udhëtarë çdo vit.

Në Francë, disa linja më të vogla tashmë janë hequr ose pritet të hiqen në të ardhmen. Këto përfshijnë fluturime nga aeroporte rajonale si Bergerac dhe Strasbourg.

“Ryanair do të largohet nga aeroportet rajonale franceze në verën e vitit 2026”, tha drejtori komercial i kompanisë, Jason McGuinness, për revistën franceze të biznesit Challenges.

Çfarë do të thotë kjo për  udhëtarët nga suedia

Për udhëtarët nga Suedia, këto shkurtime do të thonë më pak fluturime direkte dhe më pak zgjedhje të lira për udhëtime brenda Europës gjatë vitit 2026.

Sidomos udhëtimet drejt Spanjës dhe Francës mund të bëhen më të vështira, pasi disa destinacione nuk do të kenë më fluturime direkte me Ryanair. Kjo mund t’i detyrojë udhëtarët të përdorin linja të tjera ajrore ose të bëjnë ndalesa në aeroporte të tjera, gjë që mund të rrisë kohën dhe koston e udhëtimit.