Stuhi e re bore po vjen, paralajmërim portokalli në Goteborg.

Një valë e re reshjesh bore pritet të godasë Suedinë të mërkurën. Sipas agjencisë TT, bora do të përfshijë jugun dhe pjesën qendrore të vendit. Moti i keq pritet të shkaktojë sërish probleme në trafik, edhe pse ndikimi nuk pritet të jetë aq i rëndë sa gjatë stuhive të mëparshme Johannes dhe Anna.

Gjatë mëngjesit, Instituti Suedez i Meteorologjisë dhe Hidrologjisë (SMHI) ka lëshuar një paralajmërim portokalli për Goteborgun dhe disa zona të bregdetit perëndimor. Arsyeja është rreziku për reshje të forta bore. Qytetarët këshillohen të mos dalin në trafik pa nevojë dhe të tregojnë kujdes të shtuar.

Meteorologu i SMHI-së, Kjell Lund, i tha gazetës GP se gjatë natës kanë rënë deri në dy decimetra borë. Ai shtoi se pritet të bjerë edhe po aq borë në vazhdim.

Sipas gazetës Aftonbladet, ekziston mundësia që gjatë fundjavës të ndodhë një i ashtuquajtur “ditë kombëtare akulli”. Kjo do të thotë se temperatura do të qëndrojë nën zero gradë në të gjithë Suedinë për 24 orë rresht.

Shpjegimi i paralajmërimeve të SMHI-së:

• Paralajmërim i verdhë: Ka pasoja për shoqërinë dhe disa rreziqe për qytetarët.
• Paralajmërim portokalli: Ka pasoja serioze për shoqërinë dhe rrezik për qytetarët.
• Paralajmërim i kuq: Ka pasoja shumë serioze për shoqërinë dhe rrezik të madh për qytetarët.