Trenat më të përpiktë në vitin 2025, shumica mbërritën në kohë

Gjatë vitit 2025, shumica e trenave në Suedi mbërritën në kohë. Sipas njoftimit të Trafikverket, Administrata Suedeze e Transportit, nëntë nga dhjetë trena arritën destinacionin e tyre pa vonesa të mëdha. Kjo e bën vitin 2025 një nga vitet më të mira për përpikërinë e trenave në disa vite.

Nga mbi 1 milion e 80 mijë trena pasagjerësh që qarkulluan gjatë vitit, 88,6% mbërritën në kohë. Një tren llogaritet si i përpiktë nëse arrin në stacionin përfundimtar jo më shumë se pesë minuta pas orarit të planifikuar.

Përpikëria e trenave ishte më e mira që nga viti 2022. Krahasuar me vitin 2024, ajo u përmirësua me 1,4 pikë përqindjeje, ndërsa krahasuar me vitin 2023 u rrit me 0,9 pikë përqindjeje.

Muaji dhjetor shënoi rezultate shumë të mira. Gjatë këtij muaji, 92% e trenave mbërritën në kohë, edhe pse Suedia u përball me stuhinë Johannes gjatë ditëve mes Krishtlindjeve dhe Vitit të Ri.

Trafikverket njofton se gjatë vitit të kaluar në shinat hekurudhore qarkulluan më shumë trena dhe u zhvilluan më shumë punime në hekurudhë se kurrë më parë. Megjithatë, pavarësisht kësaj ngarkese të madhe, numri i problemeve dhe ndërprerjeve që shkaktuan vonesa në trafik u ul me më shumë se 10 pikë përqindjeje.

Burimi: SVT

link: https://www.svt.se/nyheter/inrikes/fler-tag-kom-fram-i-tid-under-2025