Kontroll më i rreptë për punonjësit e shkollave në Suedi

Partitë e marrëveshjes Tidö duan të forcojnë kontrollin dhe mbikëqyrjen ndaj stafit që punon në shkolla. Kjo u bë e ditur në një konferencë për shtyp nga ministrja e Arsimit dhe Integrimit, Simona Mohamsson (L), dhe ministrja e Shërbimeve Sociale, Camilla Waltersson Grönvall (M).

Sipas një propozimi të ri ligjor të dërguar për shqyrtim në Këshillin Legjislativ, personat që kërkojnë punë në shkolla nuk do të mjaftohen më vetëm me paraqitjen e ekstraktit nga regjistri penal. Ata do të duhet të dorëzojnë edhe një ekstrakt nga regjistri i dyshimeve penale.

Në të njëjtin propozim thuhet gjithashtu se lista e veprave penale që shfaqen në këto dokumente, e quajtur “katalogu i krimeve”, do të zgjerohet me rreth 30 krime të reja. Këtë e raporton Nyheterna në TV4. Ndër krimet dhe dyshimet që propozohet të përfshihen janë, ndër të tjera, fotografimi fyes, shtypja e lidhur me nderin dhe veprat penale që lidhen me armët.

Qëllimi i këtyre masave është të rritet siguria në shkolla dhe të mbrohen fëmijët. “Asnjë prind nuk duhet të ketë frikë apo shqetësim kur lë fëmijën e tij në shkollë”, tha ministrja Simona Mohamsson, sipas gazetës Aftonbladet.