Radhët për operacione në Sahlgrenska janë shkurtuar ndjeshëm

Gjatë vitit 2025, radhët për operacione në Spitalin Universitar Sahlgrenska në Goteborg janë përgjysmuar, raporton agjencia suedeze e lajmeve TT. Pacientët që presin për operacione si ndërrimi i nyjës së ijes apo i gjurit tani nuk duhet të presin më deri në dy vjet, por vetëm rreth 90 ditë.

Sipas të dhënave, gjatë vitit 2025 janë kryer mbi 4 000 operacione më shumë krahasuar me një vit më parë. Ulja më e madhe e radhëve është vërejtur në shërbimet ortopedike dhe gjinekologjike.

Kjo situatë e re po mirëpritet nga Pernilla Dahm Kähler, shefe e shërbimit të gjinekologjisë dhe mjekësisë riprodhuese në Sahlgrenska.

“ Gjatë pandemisë, këto lloj operacionesh u anuluan ose u shtynë për t’u lënë përparësi operacioneve më urgjente ose atyre të kancerit. Për këtë arsye, shumë gra janë detyruar të presin për një kohë shumë të gjatë”, shprehet ajo.

Shkurtimi i radhëve shihet si një hap i rëndësishëm për përmirësimin e kujdesit shëndetësor dhe lehtësimin e pritjes për mijëra pacientë.

Burimi: TT