Bora rrugës drejt Göteborgut. Priten probleme në trafik

Göteborgu po përballet me një tjetër kthim të fortë të dimrit. Borë, erë dhe temperatura nën zero pritet të shkaktojnë probleme serioze në trafik në qytet. Instituti Suedez i Meteorologjisë, SMHI, paralajmëron për rrezik të grumbullimit të borës, shikueshmëri të dobët dhe efekt të fortë ftohjeje. Për këtë arsye është lëshuar një paralajmërim i verdhë.

Katër javë pas reshjeve të mëdha të borës që goditën Göteborgun, një tjetër valë bore është në rrugë drejt qytetit. Reshjet do të fillojnë natën drejt së premtes dhe do të vazhdojnë deri të shtunën paradite, thotë Lisa Frost, meteorologe në SMHI.

Sipas saj, reshjet e borës në kombinim me erëra të freskëta nga veriu mund të shkaktojnë vështirësi të mëdha në trafik. Parashikohet që të bien nga pesë deri në dhjetë centimetra borë e re, dhe në disa zona lokale mund të bjerë edhe më shumë. Edhe pse këto sasi mund të mos duken të mëdha, era nga lindja ose verilindja rrit ndjeshëm rrezikun për formimin e grumbujve të borës dhe për shikueshmëri të dobët.

SMHI ka lëshuar një paralajmërim të verdhë për pjesë të rajoneve Halland dhe Västra Götaland për shkak të reshjeve të borës. Paralajmërimi është në fuqi nga ora 06:00 e mëngjesit të së premtes deri në orën 20:00 të po asaj dite.

Ky paralajmërim do të thotë se ekziston rrezik për kohë më të gjata udhëtimi, vështirësi në qarkullimin rrugor, anulime ose vonesa në transportin publik, si dhe ndërprerje të mundshme në rrjetin elektrik dhe atë të telefonisë, veçanërisht në zonat ku ka linja ajrore.

SMHI ka njoftuar gjithashtu për paralajmërime të verdha dhe portokalli edhe në rajonin e Skåne-s.

Meqë temperaturat do të vazhdojnë të qëndrojnë nën zero për aq sa shtrihet parashikimi i motit, bora pritet të qëndrojë në tokë për disa ditë, ndoshta për gëzimin e fëmijëve që janë me pushime dimërore.

Temperaturat ditët në vijim pritet të jenë rreth pesë gradë nën zero, si ditën ashtu edhe natën. Megjithatë, për shkak të erës së fortë nga lindja ose verilindja, i ftohti do të ndihet edhe më i ashpër. Sipas Lisa Frost, me temperaturat aktuale dhe erë me shpejtësi rreth dhjetë metra në sekondë, i ftohti mund të ndihet si minus katërmbëdhjetë gradë. Ajo thekson se nuk duhet t’i besohet vetëm termometrit dhe u bën thirrje qytetarëve të vishen ngrohtë.

Meteorologia gjithashtu këshillon që njerëzit të qëndrojnë të përditësuar me paralajmërimet e SMHI-së, të mbajnë distancë në trafik nëse duhet të udhëtojnë dhe të tregojnë kujdes të shtuar për shkak të grumbullimit të borës dhe shikueshmërisë së dobët.

Kushtet e motit do të ndikojnë edhe në trafikun detar. Kompania Styrsöbolaget njofton se për shkak të akullit të formuar në arkipelag, trafiku i anijeve do të kalojë në “orar dimëror për akull të lehtë” duke filluar nga 5 shkurti dhe deri në një njoftim të ri. Gjithashtu, nuk do të kryhen asnjë udhëtim drejt apo nga Stenpiren.

Burimi: GP

Link: https://www.gp.se/nyheter/goteborg/sno-pa-vag-in-over-goteborg-risk-for-trafikproblem.6c7bbf52-92fb-44d2-a1da-a35d7aa5d62c