Alarm për kujdesin ndaj çrregullimeve të të ngrënit në Stokholm, pavarësisht statistikave pozitive

Kur Rajoni i Stokholmit mori përgjegjësinë për kujdesin ndaj çrregullimeve të të ngrënit, u premtua ndihmë më e shpejtë dhe rezultate më të mira për pacientët. Statistikat tregojnë se ka pasur përmirësime, mes tyre edhe kohë më të shkurtra pritjeje. Megjithatë, disa pacientë po ngrenë alarmin për probleme serioze në kujdesin që marrin. Këtë e raporton SVT Nyheter Stockholm.

Pacientët thonë se ndihen më pak të mbështetur se më parë dhe se cilësia e ushqimit është përkeqësuar. Sipas tyre, kujdesi nuk është i mjaftueshëm dhe nuk i ndihmon realisht për të trajtuar çrregullimet e tyre të të ngrënit.

Edhe punonjës të shëndetësisë, me të cilët ka folur SVT, shprehin shqetësim. Ata thonë se kanë shumë pak burime dhe nuk arrijnë t’u japin pacientëve ndihmën që u nevojitet.

Një punonjës në kujdesin spitalor shprehet se pacientët trajtohen më shumë si në një lloj izolimi fizik.

“Ndjehet sikur ata mbahen vetëm për t’u stabilizuar fizikisht dhe sapo të kenë shtuar peshë, shkruhen nga spitali. Më pas kthehen sërish, sepse nuk kanë marrë ndihmë të vërtetë për çrregullimin e tyre të të ngrënit”, thotë ai.

Nga ana tjetër, drejtuesja e Qendrës së Stokholmit për Çrregullime të të Ngrënit (SCÄ) nuk pajtohet me kritikat. Sipas saj, kujdesi nuk është përkeqësuar.

“Ne punojmë, ashtu si edhe më parë, sipas udhëzimeve kombëtare dhe metodave që rekomandohen, “thotë Mikaela Lithman, drejtuese e SCÄ.

Burimi: SVT

Link: https://www.svt.se/nyheter/lokalt/stockholm/atstorningsvarden-i-stockholm-battre-statistik-samre-vard