Nga 1 prilli 2026 ndryshojnë rregullat për ndryshimin e pronësisë së automjeteve në Suedi

Nga 1 prilli 2026 hyn në fuqi një ndryshim në rregullat e regjistrimit të automjeteve në Suedi. Sipas njoftimit të Transportstyrelsen, do të hiqet kërkesa që pjesa 2 e certifikatës së regjistrimit të automjetit (registreringsbevis del 2) të merret dhe të ruhet si dokument kur bëhet ndryshimi i pronësisë përmes njoftimit direkt (direktanmälan).

Ndryshimi bëhet në kapitullin 9, neni 10 të rregullores së Transportstyrelsen për regjistrimin e automjeteve në regjistrin e trafikut rrugor TSFS 2015:63.

Si ishte rregulli deri tani

Sipas rregullave aktuale në TSFS 2015:63, kur një person ose kompani me leje (për shembull një tregtar makinash) regjistron veten si pronar të ri të një automjeti përmes njoftimit direkt, ai duhet të marrë pjesën 2 të certifikatës së fundit të regjistrimit të pronarit të mëparshëm dhe ta ruajë atë si pjesë të dokumentacionit të regjistrimit.

Nëse kjo certifikatë ishte humbur, pronari i regjistruar duhej të porosiste një certifikatë të re para se të mund të bëhej ndryshimi i pronësisë.

Çfarë ndryshon nga 1 prilli 2026

Nga 1 prilli 2026 do të hiqet paragrafi që thotë:

“Nëse mbajtësi i lejes regjistron veten si pronar të ri të një automjeti, pjesa 2 e certifikatës së fundit të regjistrimit të pronarit të mëparshëm duhet të merret dhe të jetë pjesë e dokumentacionit të regjistrimit.”

Kjo do të thotë se pjesa 2 e certifikatës nuk do të jetë më e detyrueshme si dokument që duhet të merret dhe të ruhet gjatë këtij procesi.

Pse bëhet ky ndryshim

Sipas Transportstyrelsen, ndryshimi bëhet për disa arsye kryesore:

• për të zvogëluar varësinë nga dokumentet fizike të regjistrimit
• për të ulur numrin e certifikatave të regjistrimit që lëshohen
• për të thjeshtuar procesin e ndryshimit të pronësisë së automjeteve

Numri i kontrollit mbetet i detyrueshëm

Edhe pse kërkesa për të marrë fizikisht pjesën 2 të certifikatës hiqet, kërkesa për të dhënë numrin e kontrollit (kontrollnummer) nga kjo certifikatë mbetet ende në fuqi kur bëhet njoftimi i inbytit përmes direktanmälan.

Nëse pronari i automjetit nuk e ka certifikatën dhe nuk e di numrin e kontrollit, ai mund ta marrë atë përmes shërbimit elektronik “Mina sidor” në faqen e internetit të Transportstyrelsen  duke u identifikuar me e-ID.

Rruga për ta gjetur numrin në sistem është:

Mina sidor → Mina fordon → Mitt fordon → Uppgifter om fordon → Registreringsbevis

Kush mund ta shohë numrin e kontrollit online

Aktualisht vetëm personat privatë mund të hyjnë në Mina sidor dhe të marrin numrin e kontrollit në mënyrë digjitale.

Personat juridikë, si për shembull kompanitë dhe organizatat, nuk kanë ende mundësi ta shohin këtë numër online. Për këtë arsye, ata duhet të kenë ende qasje në certifikatën fizike të regjistrimit.

Rregullat e tjera mbeten të njëjta

Sipas Transportstyrelsen , të gjitha kërkesat e tjera për raportimin e ndryshimit të pronësisë përmes direktanmälan mbeten të pandryshuara.

Informacion shtesë

Për pyetje rreth këtij ndryshimi mund të kontaktohet helpdesk-u për direktanmälare i Transportstyrelsen në numrin e telefonit 010-495 54 08.

Orari i shërbimit:

• E hënë, e martë dhe e enjte: 09:00 – 16:00
• E mërkurë: 12:00 – 16:00
• E premte: 09:00 – 13:00

Burimi: Transportstyrelsen

Link: https://www.transportstyrelsen.se/sv/vagtrafik/fordon/fordons-agaruppgift/direktanmal-och-sok-i-vagtrafikregistret/direktanmalan/senaste-nytt-inom-direktanmalan/registreringsbevis/