Taksë e re për pronarët e pasurive të pa luajtshme mund të vendoset nga 1 gushti.

Një propozim i ri për një tarifë ndaj pronarëve të pasurive të paluajtshme është paraqitur së fundmi. Sipas këtij propozimi, disa pronarë mund të detyrohen të paguajnë një tarifë për bashkëpunimin dhe sigurinë në zonat e banimit. Megjithatë, propozimi është kritikuar dhe disa e quajnë atë thjesht një taksë shtesë që nuk ka një funksion të qartë.

Herë pas here në Riksdagen propozohen ligje dhe rregulla të reja. Që nga 1 janari i këtij viti kanë hyrë në fuqi disa ndryshime ligjore. Ndër to përfshihen ulja e taksës së energjisë për energjinë elektrike, vendosja e një moshe orientuese për pension, rritja e mbështetjes për kthimin në vendlindje dhe zgjerimi i mundësive në sistemin e sigurimeve shoqërore, përfshirë edhe mundësinë për të marrë leje për t’u kujdesur për fëmijët e sëmurë.

Ligj i ri për pronarët e pronave

Më 5 mars qeveria publikoi një njoftim për shtyp nga Ministria e Zhvillimit Rural dhe Infrastrukturës. Në këtë njoftim u bë e ditur se është paraqitur një projektligj që mund të çojë në miratimin e një ligji të ri.

Sipas këtij propozimi, pronarët e pasurive të paluajtshme mund të paguajnë një tarifë për bashkëpunimin në zonat e banimit, me qëllim përmirësimin e sigurisë dhe parandalimin e krimit.

Ministri i Infrastrukturës dhe Banimit, Andreas Carlson, tha në njoftimin për shtyp se ky është një hap i rëndësishëm për të rritur sigurinë dhe për të bërë që më shumë njerëz të marrin përgjegjësi në komunitet.

Ai theksoi se bëhet fjalë për jetën e përditshme të njerëzve: që ata të mund të kthehen në shtëpi pa frikë, që bizneset të kenë guxim të investojnë dhe të krijojnë vende pune dhe që fëmijët të ndihen të sigurt në lagjen e tyre.

Sipas tij, për të krijuar lagje më të sigurta nevojiten mjete që funksionojnë dhe bashkëpunimi në zonat e banimit është një prej tyre. Ai shtoi se lagjet e sigurta kërkojnë përgjegjësi të përbashkët dhe një shoqëri që bashkëpunon.

Mbështetje nga Sverigedemokraterna

Edhe Sverigedemokraterna  mbështet propozimin. Mikael Eskilandersson, zëdhënës për çështjet civile në këtë parti, tha se qëllimi i ligjit është të bëjë zonat e banimit më të sigurta dhe të forcojë angazhimin lokal kundër kriminalitetit.

Ai theksoi se për të arritur lagje më të sigurta nevojiten si përgjegjësi ashtu edhe drejtësi. Sipas tij, me këtë ligj do të sigurohet që të gjithë pronarët e pasurive që përfitojnë nga bashkëpunimi në zonë të kontribuojnë gjithashtu financiarisht.

Sipas projektligjit, pronat që kanë vetëm shtëpi njëfamiljare ose dyfamiljare, si dhe ndërtesat ndihmëse që lidhen me to, nuk do të detyrohen të paguajnë këtë tarifë.

Partitë që janë dakord me këtë ligj janë Moderaterna, Kristdemokraterna, Liberalerna dhe Sverigedemokraterna.

Kritika ndaj propozimit

Megjithatë, jo të gjithë janë të bindur për nevojën e këtij ligji. Organizata Fastighetsägarna ka reaguar duke thënë se propozimi ka marrë shumë kritika.

Sipas kësaj organizate, shumica e institucioneve që kanë dhënë mendimin e tyre kanë vënë në dyshim nevojën për një ligj të detyrueshëm. Edhe Këshilli i Legjislacionit ka theksuar se qeveria nuk ka treguar qartë se pronarët e pasurive ose komunat e kanë kërkuar këtë ligj ose se ai zgjidh një problem të qartë.

Anna Thureson, eksperte për politika ekonomike në organizatën Fastighetsägarna, tha se problemi me këtë ligj është se ai është i detyrueshëm dhe mund të ulë interesin e qytetarëve që sot bashkëpunojnë vullnetarisht për të përmirësuar lagjet e tyre.

Sipas saj, ligji i ri mund të mos ndihmojë në rritjen e sigurisë dhe atraktivitetit të zonave, por mund të kthehet në një taksë shtesë për bizneset lokale të pasurive të paluajtshme.

Ajo shtoi se në vend që të vendosë taksa të reja dhe më shumë rregulla, qeveria duhet të forcojë bashkëpunimin që tashmë ekziston midis pronarëve të pasurive, komunave, policisë dhe aktorëve lokalë.

Nëse partitë që e mbështesin propozimin e miratojnë atë, ligji i ri pritet të hyjë në fuqi më 1 gusht 2026.

Burimi: Nyheter24

Link:https://nyheter24.se/nyheter/ekonomi/privatekonomi/1465549-ny-skatt-for-husagare-kan-inforas-1-augusti-far-kritik