Qeveria suedeze dhe SD vazhdojnë me “detyrimin për informim” për emigrantët e paligjshëm

Qeveria suedeze dhe partia Demokratët e Suedisë (SD) do të vazhdojnë me zbatimin e të ashtuquajturit “detyrim për informim”.

Ky vendim u bë i ditur nga përfaqësues të qeverisë dhe SD gjatë një konference për shtyp, sipas agjencisë TT.

Sipas këtij propozimi, punonjësit në disa institucione shtetërore do të jenë të detyruar të njoftojnë policinë nëse zbulojnë persona që nuk kanë të drejtë të qëndrojnë në Suedi.

Kjo është një nga propozimet e reja për ndryshime në ligj, me qëllim që autoritetet ta kenë më të lehtë të gjejnë personat që ndodhen në vend pa leje.

Detyrimi për informim do të përfshijë gjashtë institucione shtetërore. Ndër to janë edhe Administrata Tatimore (Skatteverket) dhe Agjencia e Sigurimeve Shoqërore (Försäkringskassan). Këto institucione do të duhet të japin informacion te policia me iniciativën e tyre.

Kjo çështje ka shkaktuar debat mes partive të marrëveshjes Tidö. Sidomos Demokratët e Suedisë kanë kërkuar që ky detyrim të jetë më i gjerë dhe të përfshijë edhe punonjës në shëndetësi, arsim dhe shërbime sociale.

Kritikët e kanë quajtur këtë një “ligj denoncimi”.

Në fund, katër partitë janë marrë vesh që sektorët e shëndetësisë, arsimit dhe shërbimeve sociale të mos përfshihen në këtë detyrim.

Burimi: Omni/TT/Regeringen.se

Link: https://tt.omni.se/informationsplikt-ska-hitta-fler-i-skuggsamhallet/a/q661oo

https://regeringen.se