Ministrja e Financave: Ndryshoni bankë nëse nuk jeni të kënaqur

Ministrja e Financave e Suedisë, Elisabeth Svantesson, u ka bërë thirrje qytetarëve që të ndryshojnë bankë, pasi disa nga bankat më të mëdha kanë rritur normat e interesit për kreditë e banesave.

Gjatë javës së fundit, banka të mëdha si Swedbank, Nordea, SBAB dhe SEB kanë rritur interesat për kreditë me normë të ndryshueshme. Kjo ka ndodhur edhe pse Riksbanken nuk ka rritur normën bazë të interesit dhe nuk ka pasur rritje të interesit për kursimet.

Zakonisht, interesat e kredive të tilla ndjekin vendimet e bankës qendrore. Por këtë herë, bankat kanë vendosur të veprojnë ndryshe.

Sipas bankave, arsyeja është rritja e kostove të financimit në tregjet ndërkombëtare. Ato thonë gjithashtu se lufta në Iran ka ndikuar në rritjen e normave të tregut dhe se pritet që normat bazë të rriten më vonë gjatë vitit.

Zëvendësguvernatori i bankës qendrore, Per Jansson, tha se ky zhvillim do të merret parasysh në parashikimet e ardhshme të bankës:

“Kjo mund të ndikojë në mënyrën se si do të vendosim për normën bazë në të ardhmen”, tha ai për mediat.

Ministrja Svantesson tha se e kupton reagimin e qytetarëve:

“E kuptoj shumë mirë që kjo i shqetëson njerëzit. Edhe mua më duket problem. Shumë qytetarë që kanë vështirësi ekonomike e shohin këtë si të padrejtë dhe jo morale, sidomos kur bankat kanë fitime të mëdha”.

Ajo theksoi se, ndërkohë që interesat për kreditë janë rritur, interesat për kursimet nuk janë rritur, gjë që ka shtuar pakënaqësinë e klientëve.

“ Problemi kryesor është se shumë njerëz mendojnë se bankat po fitojnë shumë. Është mirë që bankat të kenë fitime, por këto fitime janë shumë të mëdha. Më shumë para duhet t’u kthehen klientëve, si atyre që kursejnë, ashtu edhe atyre që marrin kredi”, tha ajo.

Megjithatë, ministrja theksoi se nuk është kundër fitimeve të bankave dhe nuk kërkon taksimin e tyre. Sipas saj, zgjidhja është që qytetarët të jenë më aktivë.

Qeveria, sipas saj, ka ndërmarrë hapa për ta bërë më të lehtë ndryshimin e bankës, duke ulur kostot e transferimit të kredive dhe duke thjeshtuar dokumentet në formë digjitale.

“Klientët duhet të veprojnë, të negociojnë dhe të mos hezitojnë të ndryshojnë bankë. Ky është një treg i veçantë, ku çmimet nuk janë gjithmonë të qarta”, përfundoi ajo.

Burimi: SVT

Link: https://www.svt.se/nyheter/ekonomi/finansministern-om-storbankerna-omoraliskt-och-oratt