Suedi: Personat pa dokumente “Papperslösa” shmangin kujdesin shëndetësor nga frika e raportimit.

Numri i personave pa dokumente që kërkojnë ndihmë mjekësore është më shumë se përgjysmuar gjatë katër viteve të fundit. Sipas punonjësve të shëndetësisë, arsyeja kryesore është frika se ata mund të raportohen në polici.

Një infermiere specialiste, tregon për gazetën DN se frika është bërë shumë e madhe. Ajo përmend rastin e fundit të një gruaje shtatzënë që kishte frikë të shkonte në spital, sepse mendonte se mund të raportohej. Gruaja kishte pyetur nëse lindja në shtëpi mund të ishte një alternativë.

Sipas agjencisë TT, në mars partitë e marrëveshjes Tidö paraqitën një propozim ligjor që kërkon nga autoritetet të raportojnë personat pa dokumente kur bien në kontakt me ta. Megjithatë, kujdesi shëndetësor, shkollat dhe shërbimet sociale janë përjashtuar nga ky detyrim.

Por ekziston një detaj i rëndësishëm: fëmijët që lindin në spital regjistrohen në Skatteverket (Agjencia Tatimore), e cila përfshihet në detyrimin për raportim. Kjo rrit edhe më shumë pasigurinë dhe frikën tek prindërit pa dokumente.

Punonjësit e shëndetësisë thonë gjithashtu se ka edhe arsye të tjera pse më pak persona pa dokumente kërkojnë ndihmë. Disa nuk i njohin të drejtat e tyre, ndërsa të tjerë janë refuzuar më parë kur kanë kërkuar kujdes mjekësor.

Si pasojë, gjithnjë e më shumë persona pa dokumente po shmangin kontaktin me sistemin shëndetësor, edhe kur kanë nevojë për ndihmë.

Burimi:DN/Omni/TT

Link: https://www.dn.se/sverige/allt-farre-papperslosa-soker-vard-de-ar-radda/

https://tt.omni.se/informationsplikt-ska-hitta-fler-i-skuggsamhallet/a/q661oo