Qeveria shton fondet për qendrat e kthimit: “Nuk është mjaftueshëm mirë”

Qeveria suedeze ka vendosur t’i japë më shumë para dhe detyra të reja Agjencisë së Migracionit për të përmirësuar kushtet në qendrat e kthimit. Kjo vjen pasi më herët janë raportuar probleme dhe mangësi në disa prej këtyre qendrave në të gjithë vendin.

Ministri i emigracionit, Johan Forssell, thotë se nevojitet një përmirësim i dukshëm:

“Kërkohet një nivel më i lartë angazhimi. Në disa vende nuk është mjaftueshëm mirë”.

Qeveria do të japë 150 milionë krona shtesë. Këto para do të përdoren për të rritur numrin e punonjësve, sidomos edhe jashtë orarit zyrtar, si dhe për të forcuar sigurinë në mënyrë që persona të paautorizuar të mos hyjnë në qendra.

Qëllimi është që banorët të kenë kushte më të mira jetese dhe të ndihen më të sigurt.

Sipas ministrit, kushtet për fëmijët duhet të përmirësohen. Ai përmend më shumë mundësi për lojë, pushim dhe për të bërë detyrat e shkollës. Gjithashtu, qeveria dëshiron më shumë aktivitete për fëmijët, edhe me ndihmën e organizatave të shoqërisë civile.

“ Ata bëjnë një punë shumë të rëndësishme, por mund të bëjnë edhe më shumë”, thotë ai.

Kur pyetet se çfarë nuk ka funksionuar më parë, Forssell përgjigjet:

“Ka funksionuar, por duhet bërë më shumë. Duhet më shumë staf, sidomos jashtë orarit. Është e rëndësishme që fëmijët dhe familjet të ndihen të sigurt”.

Ai ka vizituar disa qendra dhe thotë se kushtet ndryshojnë shumë nga një vend në tjetrin. Në disa raste janë gjetur edhe objekte të rrezikshme.

“Nuk është diçka e zakonshme, por çdo rast është shumë. Kjo ndikon si te banorët ashtu edhe te punonjësit”.

Në muajin tetor do të hiqet sistemi EBO, që u lejon azilkërkuesve të jetojnë vetë. Pas kësaj, të gjithë azilkërkuesit do të jetojnë në qendrat e Agjencisë së Migracionit  si në qendrat e pritjes, ashtu edhe në ato të kthimit.

“Do të ketë më shumë njerëz që jetojnë aty dhe ne duam të sigurohemi që kushtet të jenë të mira. Mund të bëjmë gjëra si lyerja e mureve, shtimi i stafit apo krijimi i hapësirave për lojëra”, thotë ministri.

Sipas Forssell, qëndrimi në këto qendra duhet të jetë i shkurtër.

“ Është shumë kohë e gjatë. Duam ta shmangim këtë. Azilkërkuesit duhet të respektojnë vendimet e autoriteteve dhe të kthehen në vendin e tyre kur kërkesa u refuzohet”.

Ai shton se kur qëndrimi zgjat shumë, shpesh ndodh sepse prindërit nuk bashkëpunojnë.

“Fatkeqësisht, fëmijët ndikohen nga vendimet e prindërve. Prandaj është e rëndësishme që ata të kenë aktivitete dhe kushte sa më të mira. Askush nuk duhet të qëndrojë më gjatë se sa është e nevojshme”.

Organizata “Rädda barnen” ka kritikuar ashpër kushtet në këto qendra. Sipas tyre, mungon mbikëqyrja dhe ambientet nuk janë të sigurta për fëmijët.

Fakte për qendrat e kthimit:

Aktualisht ka 9 qendra kthimi në Suedi.

Personat që jetojnë aty kanë një vendim përfundimtar për dëbim ose kthim, ose do të transferohen në një vend tjetër të BE-së sipas rregullit të Dublinit.

Agjencia e Migracionit siguron ushqimin dhe strehimin.

Në vitin 2024 kishte 1,269 vende, me një shfrytëzim mesatar prej 31%.

Burimi: DN

Link: https://www.dn.se/sverige/regeringen-skjuter-till-pengar-for-atervandandecenter-inte-tillrackligt-bra/