Patenta B mund të bëhet më e vlefshme, rregulla të reja nga BE dhe propozim për drejtimin e motorëve.

Bashkimi Europian ka prezantuar direktivën e katërt për patentat e drejtimit, me qëllim modernizimin e rregullave, përshtatjen me teknologjitë e reja dhe rritjen e sigurisë në trafik në të gjithë Europën.

Një nga ndryshimet kryesore është krijimi i një modeli të përbashkët digjital për patentat në vendet e BE-së. Gjithashtu, propozohet një kategori e re patente, e quajtur B1, e cila do të lejojë drejtimin e automjeteve me shpejtësi shumë të ulët. Kjo kategori mund të jepet edhe për të rinjtë nga mosha 15 vjeç.

Në lidhje me këtë direktivë, organizata e motoristëve në Suedi ka paraqitur një propozim të ri. Ata kërkojnë që personat mbi 24 vjeç, të cilët kanë patentë të kategorisë B dhe kanë udhëtuar pa asnjë shkelje gjatë dy viteve të para, të lejohen të drejtojnë edhe motorë. Ky rregull tashmë është miratuar dhe zbatuar në disa vende të BE-së, si Italia, Franca dhe Luksemburgu.

Sipas përllogaritjeve, nëse vetëm një në dhjetë udhëtime me makinë zëvendësohet me mjete me dy rrota, koha e pritjes në trafik mund të ulet deri në 40%. Këtë e ka deklaruar Roger Berzell nga organizata e motoristëve në një artikull për Hallandsposten.

Megjithatë, jo të gjithë bien dakord me këtë ide. Ekspertja e sigurisë rrugore, Jeanette Jedbäck Hindenburg, ka shprehur dyshime për këtë argument. Ajo thotë se motoristët shpesh lëvizin mes makinave dhe duket sikur zënë më pak hapësirë, por në fakt ata zënë po aq vend sa një makinë.

Nga ana tjetër, ajo pranon se një përfitim i mundshëm i këtij propozimi është ulja e ndotjes së ajrit, pasi motorët zakonisht prodhojnë më pak emetime sesa makinat.

Gjithsesi, Hindenburg thekson se drejtimi i një motori është shumë ndryshe nga drejtimi i një makine. Ajo thotë se kërkohet ekuilibër dhe përvojë dhe se nuk duhet lejuar që dikush të ngasë motor pa një trajnim paraprak.

Edhe organizata e motoristëve pajtohet me këtë ide dhe është e hapur që të vendoset një formë trajnimi ose provimi përpara se personat me patentë B të lejohen të drejtojnë motorë.

Burimi: Nyheter24

Link: https://nyheter24.se/nyheter/motor/1442775-ditt-b-korkort-kan-bli-mer-vart-men-nya-kravet?utm_medium=EB-Social&utm_source=Facebook&fbclid=IwdGRleARapDJleHRuA2FlbQIxMQBzcnRjBmFwcF9pZAo2NjI4NTY4Mzc5AAEeVeMg5dz-vBhfGFD4EpevHLkYneBKPV-gEsSF8OBEH7sJEFdqyU-7WM2sew0_aem_o_dT3t4EYxkkYAzzXv3WYg