Magdalena Andersson kërkon rritje taksash për më të pasurit në Suedi

Liderja e Partisë Socialdemokrate në Suedi, Magdalena Andersson, ka deklaruar se dëshiron të vendosë një taksë për milionerët dhe të rrisë taksën për llogaritë e kursimeve të investimeve, të njohura si investeringssparkonto. Ajo i bëri këto komente në një intervistë për gazetën suedeze Svenska Dagbladet.

Sipas Andersson, Socialdemokratët duan të rrisin taksat për personat që kanë të ardhurat më të larta në vend, ndërsa për ata që fitojnë rreth 70 mijë korona në muaj rritja nuk do të jetë e madhe.

“Ne duam të rrisim taksat për ata që kanë të ardhurat më të larta, por jo shumë për ata që fitojnë rreth 70 mijë korona”, tha ajo në intervistë.

Në bisedën si kryetare partie, Andersson foli edhe për zgjedhjet dhe mundësinë e krijimit të një qeverie të re. Ajo tha se Socialdemokratët nuk do të hyjnë në zgjedhje me një alternativë të gatshme qeverisëse, por do të garojnë si parti më vete.

Ajo shtoi se çështja se si mund të formohet më pas një qeveri me parti të tjera, si Partia e Majtë ose Partia e Qendrës, do të diskutohet më vonë nëse krijohet mundësia për bashkëpunim pas zgjedhjeve.

Megjithatë, Andersson e bëri të qartë se një bashkëpunim me Demokratët e Suedisë është i përjashtuar. Kjo vjen edhe pse ajo është kritikuar nga Anders Lindberg, redaktor politik i gazetës Aftonbladet, i cili e ka akuzuar se ka përdorur “fjalë dhe tonalitet” të ngjashëm me ato të Demokratëve të Suedisë.

Burimi: SVD/DI/SVT

Link: https://www.svd.se/a/XMo45g/magdalena-andersson-ulf-kristersson-hade-fatt-sparken

https://www.di.se/nyheter/oppnar-for-m-samarbete-det-ar-inte-uteslutet/

https://www.svt.se/nyheter/inrikes/s-profilerna-socialdemokraternas-nya-strategi-lata-som-sd