Banorët në Skåne që harxhojnë shumë ujë mund të paguajnë më shtrenjtë në të ardhmen

Mungesa e ujit në rajonin e Skåne, në jug të Suedisë, është cilësuar si më e rënda në shumë vite. Për shkak të situatës së vështirë, autoritetet prej kohësh u kanë bërë thirrje banorëve që të kursejnë ujin dhe të shmangin përdorimin e panevojshëm.

Për të ulur konsumin e lartë të ujit, Karin van der Salm, drejtoreshë e organizatës VA Syd, propozon që në të ardhmen të vendoset një sistem i ri pagese. Sipas këtij sistemi, familjet ose personat që përdorin shumë ujë do të duhet të paguajnë më shtrenjtë.

Ajo shpjegon se çmimi i ujit mund të rritet pasi një familje të kalojë një kufi të caktuar të konsumit, për shembull pas 100 litrave të parë të ujit të përdorur gjatë një dite.

Van der Salm thotë se një model i tillë përdoret tashmë në menaxhimin e mbeturinave, ku ata që prodhojnë më shumë mbeturina paguajnë më tepër. Sipas saj, tani që sektori i ujit dhe kanalizimeve po kalon në përdorimin e matësve digjitalë, një sistem i tillë mund të zbatohet edhe për ujin.

Autoritetet shpresojnë se kjo mënyrë do të ndihmojë në uljen e harxhimit të ujit dhe në menaxhimin më të mirë të rezervave gjatë periudhave me mungesë të reshjeve.

Burimi: Sydsvenskan

Link: https://www.sydsvenskan.se/skane/slosare-kan-fa-betala-mer-for-vattnet/