Radhë të gjata në spitale për pacientët më të sëmurë në Suedi

Garancia e kujdesit shëndetësor në Suedi parashikon që pacientët duhet të marrin trajtim brenda 90 ditëve. Por në shumë raste kjo nuk po ndodh. Sipas një raporti të publikuar nga Shoqata e Mjekëve në Suedi dhe të raportuar nga TT, pacientët që janë më të sëmurë po presin më gjatë për operacione sesa pacientët që janë në gjendje më të mirë shëndetësore.

Raporti tregon se problemet janë më të dukshme te pacientët që kanë nevojë për kirurgji të shtyllës kurrizore. Ata që janë më rëndë të sëmurë duhet të presin shumë më gjatë për operacion.

Sipas raportit, një nga arsyet është se pacientët më të shëndetshëm mund të dërgohen më lehtë te klinikat private për trajtim. Ndërsa pacientët me disa sëmundje njëkohësisht kanë nevojë për kujdes më të specializuar, afër repartit të terapisë intensive dhe trajtim më të avancuar pas operacionit.

Ky problem nuk është i ri. Edhe gjatë vitit 2024 ishte raportuar e njëjta situatë.

Shoqata e Mjekëve ka krahasuar kohën e pritjes mes rajoneve të ndryshme dhe sipas gjendjes shëndetësore të pacientëve.

Në rajonin e Gävleborgut, një pacient që ka nevojë për operacion të shtyllës kurrizore pret mesatarisht 43 ditë. Ndërsa në Västerbotten dhe Uppsala pritja mund të zgjasë deri në gjashtë muaj. Disa pacientë kanë pritur deri në tre vjet për ndërhyrje kirurgjikale. Të gjitha shifrat janë për vitin 2025.

Koha mesatare e pritjes për operacione:

Kirurgji e shtyllës kurrizore

• Pacientë të shëndetshëm: 42 ditë
• Pacientët më të sëmurë: 115 ditë

Vendosje e protezës së gjurit

• Pacientë të shëndetshëm: 97 ditë
• Pacientët më të sëmurë: 136 ditë

Vendosje e protezës së kofshës

• Pacientë të shëndetshëm: 81 ditë
• Pacientët më të sëmurë: 91 ditë

Raporti ngre shqetësime se pacientët që kanë më shumë nevojë për kujdes po detyrohen të presin më gjatë se të tjerët për trajtim dhe operacione në sistemin shëndetësor suedez.

Burimi: Omni/TT

Link: https://tt.omni.se/de-sjukaste-far-vanta-langst-pa-vard/a/Pd55PR