Profesionet më të paguara në Suedi dhe kur dalin në pension: Paga e lartë nuk do të thotë gjithmonë karrierë më e gjatë

Statistikat më të fundit nga Statistiska centralbyrån (SCB) tregojnë se drejtuesit më të lartë në sektorin bankar, financiar dhe të sigurimeve janë njerëzit më të paguar në Suedi, me një pagë mesatare prej 158 900 koronash suedeze në muaj. Megjithatë, sipas të dhënave nga Pensionsmyndigheten, nuk janë profesionet me pagat më të larta ato që punojnë më gjatë.

Ndërsa drejtuesit financiarë dhe ekzekutivët largohen relativisht herët nga tregu i punës, profesione si priftërinjtë, profesorët universitarë, fizikantët dhe mjekët vazhdojnë të punojnë edhe disa vite më shumë.

Paga mesatare në Suedi ka kaluar 41 mijë korona

Paga mesatare mujore në Suedi ka arritur në 41 600 korona suedeze. Burrat fitojnë mesatarisht 43 800 korona, ndërsa gratë 39 300 korona. Diferenca mes gjinive është rreth 4 500 korona në muaj.

Por hendeku mes profesioneve është shumë i madh. Disa nga profesionet më të paguara arrijnë paga pothuajse katër herë më të larta se mesatarja kombëtare.

20 profesionet më të paguara në Suedi gjatë vitit 2024

Në vendin e parë renditen drejtuesit në banka, financë dhe sigurime (niveli 1), me një pagë mesatare prej 158 900 koronash në muaj.

Pas tyre vijnë drejtorët e përgjithshëm, rajonalë dhe komunalë me 115 200 korona, ndërsa brokerët financiarë fitojnë mesatarisht 106 500 korona.

Mjekët specialistë renditen ndër profesionet më të paguara me 93 600 korona në muaj. Drejtorët ekzekutivë (CEO) fitojnë rreth 92 100 korona, ndërsa drejtuesit ekonomikë dhe financiarë 91 700 korona.

Në listë përfshihen gjithashtu drejtues të kërkimit dhe zhvillimit me 89 500 korona, drejtues të nivelit të dytë në sektorin bankar dhe financiar me 88 000 korona, si dhe drejtues të pasurive të paluajtshme me 85 100 korona.

Drejtuesit e komunikimit dhe PR fitojnë rreth 83 400 korona në muaj, ndërsa drejtuesit e IT-së 82 600 korona.

Një nga profesionet që bie më shumë në sy është kontrollori i trafikut ajror, i cili me 81 400 korona në muaj është profesioni më i paguar në Suedi pa rol drejtues.

Në listën e profesioneve më të paguara futen edhe drejtues në ndërtim dhe miniera, drejtues klinikash dhe shëndetësie, drejtues marketingu dhe shitjesh, profesorë universitarë, drejtues në arkitekturë dhe inxhinieri, si dhe analistë financiarë dhe këshilltarë investimesh.

Profesorët janë i vetmi profesion thjesht akademik që arrin të hyjë në top 20.

Mosha e pensionit ndryshon shumë sipas profesionit

Sipas Pensionsmyndigheten, mosha mesatare e pensionit në Suedi është 65,4 vjeç.

Kjo shifër ka rënë pak krahasuar me vitin 2023, kur ishte 66 vjeç. Arsyeja lidhet me ndryshimet në sistemin e pensioneve, ku mosha minimale për pensionin publik u rrit nga 62 në 63 vjeç, ndërsa pensioni garantues nga 65 në 66 vjeç.

Megjithatë, dallimet mes profesioneve janë shumë të mëdha.

Raporti i përgatitur nga analistja Alma Masic tregon se profesorët universitarë, fizikantët, bibliotekarët, priftërinjtë dhe artistët janë ndër grupet që vazhdojnë të punojnë më gjatë para pensionit.

Profesionet ku njerëzit punojnë më gjatë

Në krye të listës renditen priftërinjtë dhe diakonët meshkuj, të cilët dalin në pension mesatarisht në moshën 67,2 vjeç.

Pas tyre vijnë fizikantët dhe kimistët meshkuj me 67,1 vjeç, ndërsa profesorët universitarë meshkuj punojnë mesatarisht deri në 67 vjeç. Gratë profesore universitare dalin në pension rreth moshës 66,7 vjeç.

Priftërinjtë dhe diakonët gra punojnë mesatarisht deri në 66,5 vjeç. Bibliotekarët dhe kuratorët e muzeve meshkuj dalin në pension po në këtë moshë.

Mjeket gra vazhdojnë të punojnë mesatarisht deri në 66,4 vjeç, ndërsa mjekët meshkuj deri në 66,2 vjeç.

Në listën e profesioneve që punojnë më gjatë përfshihen gjithashtu psikologët, psikoterapistët, dentistët, arkitektët, drejtuesit në shëndetësi, biologët, farmakologët, mësuesit e gjimnazeve, artistët, muzikantët dhe aktorët.

Ajo që i bashkon këto profesione është niveli i lartë i arsimit dhe lidhja e fortë personale me profesionin. Shumë prej tyre vazhdojnë të punojnë jo vetëm për arsye financiare, por edhe për pasion dhe ndjenjë misioni.

Paga e lartë nuk do të thotë domosdoshmërisht jetë më e gjatë pune

Statistikat tregojnë një kontrast interesant mes pagës dhe kohës së daljes në pension.

Drejtorët ekzekutivë, të cilët fitojnë mesatarisht 92 100 mijë korona në muaj, dalin në pension rreth moshës 65 vjeç.

Drejtuesit ekonomikë dhe financiarë, me paga mesatare prej 91 700 koronash, largohen edhe më herët  rreth moshës 64,7 vjeç  dhe renditen ndër profesionet me pensionimin më të hershëm në Suedi.

Nga ana tjetër, mjekët specialistë, që fitojnë 93 600 korona në muaj, vazhdojnë të punojnë deri në 66,2–66,4 vjeç.

Profesorët universitarë, edhe pse fitojnë më pak se drejtuesit financiarë, punojnë mesatarisht deri në 67 vjeç.

Rasti më interesant mbeten priftërinjtë. Ata nuk janë aspak ndër profesionet më të paguara, por janë grupi që punon më gjatë në të gjithë Suedinë.

Profesionet ku njerëzit dalin më herët në pension

Në anën tjetër të listës ndodhen kryesisht profesionet fizike dhe industriale.

Operatorët në industrinë e drurit dhe letrës, sidomos gratë, dalin në pension më herët se çdo grup tjetër, mesatarisht në moshën 64,1 vjeç.

Shumë afër janë operatorët në industrinë e çelikut dhe metalit, punëtorët e fabrikave, minatorët, salduesit, montuesit, shoferët e autobusëve dhe kamionëve, si dhe punëtorët e pyjeve.

Në këtë listë përfshihen edhe drejtuesit ekonomikë dhe financiarë meshkuj, të cilët megjithëse kanë paga shumë të larta, dalin në pension relativisht herët.

Kjo sugjeron se stresi i madh, përgjegjësitë e larta dhe ngarkesa intensive e punës mund të ndikojnë në vendimin për t’u larguar më herët nga tregu i punës.

Çdo vit shtesë pune mund të sjellë shumë më tepër para në pension

Ekspertët theksojnë se çdo vit shtesë pune mund të ndikojë ndjeshëm në pensionin përfundimtar.

Dallimi mes daljes në pension në moshën 64 dhe 67 vjeç mund të përkthehet në qindra mijëra korona më shumë gjatë gjithë jetës si pensionist.

Për këtë arsye, shumë suedezë po zgjedhin të vazhdojnë të punojnë edhe pas moshës tradicionale të pensionit, veçanërisht ata që ndihen të lidhur me profesionin e tyre dhe e konsiderojnë punën pjesë të identitetit personal.

Një sfidë më vete mbeten sipërmarrësit dhe të vetëpunësuarit. Pa kontrata kolektive dhe pa pensione shtesë nga punëdhënësi, përgjegjësia për kursimet për pension bie plotësisht mbi individin.

Burimi: SCB/ DagenPS

Link: https://www.dagensps.se/foretag/topp-20-bast-betalda-yrken-i-sverige-och-nar-de-gar-i-pension/