1,1 miliardë krona ndihmë sëmundjeje për persona të lidhur me rrjete kriminale në Suedi

Försäkringskassan ka paguar rreth 1,1 miliardë krona suedeze si ndihmë sëmundjeje për persona që konsiderohen të lidhur me rrjete kriminale gjatë katër viteve të fundit. Këtë e ka bërë të ditur Nationellt underrättelsecentrum.

Sipas televizionit suedez SVT, Försäkringskassan ende nuk e di sa prej këtyre personave kanë mashtruar për të marrë përfitimet.

Autoritetet thonë se personat e përfshirë në grupe kriminale, përveç fitimeve nga aktivitetet ilegale, kanë nevojë edhe për të ardhura të ligjshme për t’i justifikuar paratë e tyre dhe për të shmangur konfiskimin apo sekuestrimin e pasurisë. Ndihma e sëmundjes përdoret shpesh si një mënyrë për të pasur të ardhura “zyrtare”, edhe pse shumat nuk janë të mëdha.

Për vite me radhë, politika suedeze është përpjekur të ndalojë këtë formë abuzimi me sistemin social. Megjithatë, hetimet kanë treguar se persona të lidhur me krimin përdorin mjekë të korruptuar dhe dokumente të falsifikuara për të siguruar certifikata mjekësore të rreme.

Qeveria suedeze po punon aktualisht për ndryshime në ligj, me qëllim që të forcohet kontrolli dhe të ndalohen abuzimet me dokumentet mjekësore false.

“Kemi parë një nevojë të madhe për ta mbyllur këtë mundësi”, deklaroi Anna Tenje, ministre suedeze për sigurimet sociale nga Partia Moderatore (M).

Burimi: SVT/ Expressen

Link: https://www.svt.se/nyheter/lokalt/vast/forsakringskassan-korrupta-lakare-jobbar-for-gangen

https://www.expressen.se/nyheter/expressen-direkt/?post=3bf2586e-8df8-4370-8d43-03453a935092