Suedia del me papunësinë më të lartë të të rinjve në BE, por ekspertët thonë se statistikat mashtrojnë

Suedia rezulton si vendi me papunësinë më të lartë të të rinjve në gjithë Bashkimin Europian, por ekspertët thonë se kjo shifër nuk e tregon plotësisht realitetin.

Sipas statistikave, rreth 24% e të rinjve në Suedi konsiderohen të papunë. Megjithatë, kjo shifër bie ndjeshëm kur matet numri i të rinjve që nuk punojnë dhe njëkohësisht nuk studiojnë. Në këtë rast, Suedia renditet pothuajse ndër vendet me nivelin më të ulët të papunësisë së të rinjve në Europë.

Profesori suedez i ekonomisë së punës, Anders Forslund, i cili prej vitesh merret me studime për tregun e punës, shpjegon se mënyra e matjes së papunësisë në Suedi ndikon shumë në rezultatet statistikore.

Sipas rregullave ndërkombëtare, studentët suedezë që studiojnë me kohë të plotë llogariten si të papunë nëse janë duke kërkuar një punë verore ose një punë me orar të pjesshëm.

“Në vende të tjera sistemi funksionon ndryshe. Shumë të rinj konsiderohen praktikantë apo nxënës në trajnim profesional dhe, sipas përkufizimit, ata llogariten si të punësuar. Prandaj nuk mund të regjistrohen si të papunë”, shpjegon profesori Forslund.

Ai thotë se një mënyrë më e saktë për të kuptuar gjendjen reale është matja e grupit të quajtur “NEET”, që përfshin të rinjtë që as nuk punojnë dhe as nuk ndjekin shkollën apo ndonjë trajnim.

Sipas të dhënave të publikuara nga TT, kjo kategori në Suedi përbën vetëm rreth 5 deri në 6% të të rinjve të moshës 15 deri në 24 vjeç.

Burimi: Omni/TT/Mucf

Link: https://tt.omni.se/sverige-jobbsamst-i-eu-dolda-siffran-andrar-allt/a/8p5MgW

https://www.mucf.se/rapporter-och-statistik/statistik-om-unga-som-varken-arbetar-eller-studerar