Suedia shpallet zyrtarisht një vend pa duhanpirje.

Suedia është bërë zyrtarisht një vend pa duhanpirje. Lajmi është bërë i ditur nga agjencia suedeze e lajmeve TT, duke iu referuar të dhënave të Këshillit Qendror Suedez për Informim mbi Alkoolin dhe Drogat (CAN).

Sipas CAN-it, më pak se 5% e popullsisë së Suedisë pi duhan rregullisht. Ky është edhe kriteri që organizata përdor për ta përcaktuar një vend si “pa duhanpirje”.

Përgjegjësi i kërkimeve në CAN, Mats Ramstedt, e cilësoi këtë si një arritje të madhe.

“Është një zhvillim i jashtëzakonshëm që një sjellje e dëmshme mund të zvogëlohet kaq shumë”, tha ai.

Sipas Ramstedtit, ka disa arsye që kanë ndikuar në këtë ndryshim të madh. Nga njëra anë, pirja e duhanit është bërë shumë më e vështirë dhe më e shtrenjtë se më parë. Nga ana tjetër, njerëzit sot e kanë më të lehtë të marrin ndihmë dhe mbështetje për ta lënë duhanin.

Këta faktorë kanë bërë që numri i duhanpirësve të rregullt në Suedi të bjerë nën nivelin 5% të popullsisë, duke e bërë vendin zyrtarisht një vend pa duhanpirje, sipas përkufizimit të CAN-it.

Burimi: Omni/TT

Link: https://tt.omni.se/sverige-rokfritt-otrolig-utveckling/a/8p95mA