Makina elektrike ndalohen në disa tragete, rregulla të reja në Europë.

Gjatë verës, disa kompani tragetesh në Evropë kanë vendosur rregulla shumë të forta për makinat elektrike. Kjo mund t’u sjellë vështirësi pushuesve që udhëtojnë me makinë nëpër Evropë.

Një kompani norvegjeze tragetesh ka ndaluar plotësisht hyrjen e makinave elektrike, hibride dhe automjeteve me hidrogjen në anijet e saj. Kjo kompani quhet Havila Voyages dhe njihet si një nga kompanitë më miqësore me mjedisin në botë. Anijet e saj përdorin bateri shumë të mëdha, të ngjashme me energjinë e rreth njëqind makinave elektrike, dhe mund të lundrojnë disa orë pa emetime.

Por për makinat e pasagjerëve, rregullat janë krejt të ndryshme. Kompania thotë se nuk i lejon këto mjete për arsye sigurie.

“Do të donim t’i pranonim makinat elektrike dhe hibride në bord, por derisa të ketë zgjidhje që ulin rreziqet, nuk duam ta ndryshojmë këtë. Është një çështje e pastër sigurie,” tha Lasse A. Vangstein, drejtor i komunikimit dhe qëndrueshmërisë në Havila Kystruten, për TV2.

Ai shpjegon se bateritë e anijes janë vendosur në dhoma të veçanta të mbrojtura nga zjarri dhe kontrollohen vazhdimisht, deri në nivel qelize. Këto sisteme janë bërë për izolim dhe ftohje nëse ka ndonjë problem. Por kompania thotë se nuk ka kontroll të njëjtë mbi bateritë e makinave të pasagjerëve.

“Zjarri në makinat elektrike ndodh rrallë, por nëse ndodh në bord, ne duhet të largohemi nga anija dhe ta konsiderojmë të humbur. Nuk e marrim atë rrezik,” tha ai.

Ndërkohë, në Greqi që nga viti 2024 janë vendosur rregulla të reja. Aty lejohet që makinat elektrike dhe hibride të transportohen me traget vetëm nëse bateria e tyre është e karikuar deri në 40%.

Kjo rregullohet dhe kontrollohet para se makinat të hipin në anije, sipas kompanisë së madhe greke Anek Lines.

“Te automjetet plotësisht elektrike, bateritë duhet të jenë të ngarkuara maksimumi në 40% të kapacitetit total,” shkruan Anek Lines.

Nëse një makinë vjen me bateri më të mbushur se ky kufi, pronari duhet ta zbrazë baterinë deri nën 40%. Kjo mund të jetë e vështirë, sidomos në ishujt grekë ku nuk ka shumë pika karikimi.

Kjo situatë e bën më të vështirë udhëtimin për shumë pronarë makinash elektrike gjatë pushimeve verore, pasi rregullat në Norvegji dhe Greqi janë shumë të rrepta dhe krijojnë probleme gjatë udhëtimit.

Burimi: Carup

Link:https://carup.se/fallan-elbilar-stoppas-pa-farjor-i-sommar/#google_vignette