BE-ja kërkon heqjen graduale të kontrolleve në kufijtë e brendshëm

Komisioni Evropian i ka bërë thirrje Suedisë dhe tetë vendeve të tjera evropiane që të fillojnë gradualisht heqjen e kontrolleve në kufijtë e tyre të brendshëm.

Sipas Komisionit Evropian, kontrollet e forcuara në kufijtë e jashtëm të Bashkimit Evropian, të cilat po zbatohen në kuadër të Paktit të ri të BE-së për Azilin dhe Emigracionin, janë të mjaftueshme për të garantuar rendin dhe sigurinë.

Thirrja u drejtohet Suedisë, Francës, Gjermanisë, Austrisë, Italisë, Danimarkës, Holandës, Sllovenisë dhe Norvegjisë.

Komisioneri evropian për Çështjet e Brendshme, Magnus Brunner, deklaroi në një njoftim për shtyp se BE-ja po vendos në funksion sistemin më modern të menaxhimit të kufijve në botë.

“Po vendosim në funksion sistemin më modern të menaxhimit të kufijve në botë. Me këto kushte të krijuara, shtetet anëtare mund të fillojnë të heqin gradualisht kontrollet në kufijtë e tyre të brendshëm”, tha Brunner.

Rregullat e Bashkimit Evropian lejojnë rikthimin e kontrolleve në kufijtë e brendshëm në raste të veçanta, por theksojnë qartë se këto masa duhet të jenë të përkohshme.

Megjithatë, Suedia dhe disa vende të tjera i kanë mbajtur këto kontrolle për shumë vite. Autoritetet e këtyre vendeve e kanë arsyetuar vazhdimin e tyre me shqetësime që lidhen me kërcënimet terroriste, si dhe me flukset e refugjatëve dhe emigrantëve.

Komisioni Evropian vlerëson se masat e reja në kufijtë e jashtëm të BE-së tashmë ofrojnë siguri të mjaftueshme, duke krijuar mundësinë që kontrollet në kufijtë e brendshëm të fillojnë të hiqen gradualisht.

Burimi:TT/GP

Link: https://www.gp.se/nyheter/sverige/eu-dags-att-sluta-med-inre-granskontroll.3c76faa0-29de-52ef-8deb-4f2a1ba23605