Ndryshime të mëdha për patentën në Suedi. Provimi teorik do të vlejë një vit

Ndryshime të rëndësishme po vijnë për ata që planifikojnë të marrin patentën në Suedi. Pas heqjes së kërkesës për kursin e detyrueshëm të instruktorit për drejtimin praktik privat, tani po propozohet edhe një ndryshim i madh në rregullat e provimit teorik.

Agjencia Suedeze e Transportit (Transportstyrelsen) ka propozuar që vlefshmëria e provimit teorik për patentën e kategorisë B të zgjatet nga katër muaj në një vit.

Sipas rregullave aktuale, një person që kalon provimin teorik ka vetëm katër muaj kohë për të kaluar edhe provimin praktik të drejtimit. Nëse nuk arrin ta kalojë provimin praktik brenda kësaj periudhe, provimi teorik humbet vlefshmërinë dhe duhet të bëhet sërish.

Transportstyrelsen thotë se ky ndryshim do t’i ndihmojë shumë kandidatë që sot detyrohen të përsërisin provimin teorik vetëm sepse u ka mbaruar afati. Çdo vit rreth 9 000 persona bëjnë dy ose më shumë herë provimin teorik, edhe pse e kanë kaluar atë më parë.

Drejtori i përgjithshëm i Transportstyrelsen, Jonas Bjelfvenstam, thekson se nuk është e arsyeshme që njerëzit të detyrohen të dëshmojnë njohuritë e tyre duke bërë të njëjtin provim disa herë brenda një periudhe të shkurtër. Ai shton se zgjatja e afatit të vlefshmërisë do ta bëjë kategorinë B të njëjtë me kategoritë e tjera të patentave, ku vlefshmëria është më e gjatë.

Rregullat aktuale bazohen në idenë e një procesi të përbashkët provimi, ku kandidati rezervonte provimin teorik dhe atë praktik në të njëjtën kohë dhe i zhvillonte ato afër njëri-tjetrit. Qëllimi ishte që teoria dhe praktika të mësoheshin paralelisht. Megjithatë, shumë rregulla kanë ndryshuar që atëherë. Për shembull, detyrimi për të rezervuar të dy provimet në të njëjtën kohë u hoq gjashtë vjet më parë.

Edhe ministri suedez i Infrastrukturës dhe Strehimit, Andreas Carlson, e mbështet propozimin. Ai thotë se afati prej katër muajsh është shumë i shkurtër dhe krijon stres të panevojshëm për kandidatët që nuk e kalojnë provimin praktik në përpjekjen e parë dhe më pas e kanë të vështirë të gjejnë një kohë të re për provim brenda afatit.

Sipas ministrit, është e rëndësishme që kandidatët të kenë kohë të mjaftueshme për t’u përgatitur për të gjitha pjesët e provimit. Ai beson se zgjatja e vlefshmërisë së provimit teorik do të ulë presionin mbi kandidatët, do të pakësojë rastet kur njerëzit paraqiten të papërgatitur në provimin praktik dhe mund të kontribuojë edhe në uljen e radhëve për provime.

Transportstyrelsen ka dërguar tashmë propozimin për konsultim. Nëse ndryshimi miratohet, rregullat e reja pritet të hyjnë në fuqi më 17 gusht 2026.

Përveç këtij ndryshimi, në muajin gusht pritet të hiqet edhe kërkesa për kursin e instruktorit (handledarutbildning) për ata që praktikojnë drejtimin privat me një shoqërues, një tjetër ndryshim i madh për personat që po përgatiten të marrin patentën në Suedi.

Burimi:Carup

Link: https://carup.se/ny-regel-for-korkort-i-sommar-slipper-gora-om/#google_vignette