Dyndje në supermarketet norvegjeze për gjalpin e lirë, vendoset kufizim në blerje

Një ulje e madhe e çmimit të gjalpit ka shkaktuar dyndje të pazakontë në supermarketet norvegjeze. Raftet janë zbrazur shpejt, telefonat e dyqaneve po bien pa ndërprerje dhe disa dyqane kanë vendosur kufizime për sasinë që mund të blejë çdo klient.

Sipas medias norvegjeze Din Side, situata është krijuar pas uljes së çmimit të gjalpit Tine Meierismør në supermarketet SPAR. Kërkesa është rritur aq shumë sa në disa dyqane produkti mbaron menjëherë pas mbërritjes së furnizimeve të reja.

Gjatë kësaj jave, gjalpi po shitet me çmimin 36,90 krona norvegjeze për paketë. Për krahasim, sipas medias Nettavisen, e njëjta paketë prej gjysmë kilogrami kushton 59,90 krona norvegjeze në zinxhirët e tjerë të supermarketeve si Kiwi, Rema 1000 dhe Extra.

Oferta ka hyrë në fuqi të hënën dhe do të vazhdojë deri në fund të javës. Që në ditën e parë pati blerje masive. Sipas stafit të dyqanit, disa klientë blenë nga 30 deri në 40 pako gjalpë secili, gjë që detyroi menaxhmentin të ndërhyjë.

“Disa blenë 30–40 pako për person. Për këtë arsye u detyruam të vendosim kufizime”, tha Shinwary.

Tashmë është vendosur një rregull i ri: çdo familje mund të blejë maksimumi katër pako gjalpë.

Në shumë pjesë të Norvegjisë, raftet mbeten bosh deri sa të mbërrijnë furnizimet e radhës. Kjo ka shtuar edhe më shumë interesimin e klientëve për produktin.

Fushata me çmim të ulur po zhvillohet në të gjithë Norvegjinë dhe do të vazhdojë gjatë javës, ndërsa dyqanet presin furnizime të reja për të përballuar kërkesën e lartë.

Ndërkohë, kompania norvegjeze e produkteve të qumështit Tine ka konfirmuar se kërkesa për gjalpë është rritur vazhdimisht vitet e fundit. Sipas kompanisë, kjo lidhet me trendet e reja të gatimit, por edhe me rritjen e përgjithshme të çmimeve të ushqimeve.

Link: https://marcusoscarsson.se/anstorming-till-norsk-matjatte-infor-ransonering/