Avokatët u bëjnë thirrje për bojkot të këshillimit juridik për azilkërkuesit

Shoqata Suedeze e Avokatëve (Advokatsamfundet) u ka bërë thirrje anëtarëve të saj që të refuzojnë të japin këshillim juridik për azilkërkuesit. Këtë e raporton Radio Suedeze Ekot.

Thirrja lidhet me shtrëngimin e ri të ligjit për azilin, i cili do të hyjë në fuqi më 12 korrik.

Ndryshimi në ligj vjen si pasojë e futjes në ligj suedez të Paktit të ri të BE-së për azilin dhe emigracionin. Ky ndryshim do të thotë se në proceset e azilit, ndihma ligjore nuk do të jetë më si më parë. Në vend të përfaqësuesit ligjor gjatë gjithë procesit, azilkërkuesit do të marrin vetëm dy deri në tre orë këshillim juridik.

Avokatja Karin Gyllenring, e cila është pjesë e grupit të punës për çështjet e emigracionit në Shoqatën e Avokatëve, tha për Ekot se ky ndryshim mund të çojë në më shumë vendime të gabuara për dëbimin e azilkërkuesve.

Shoqata Suedeze e Avokatëve tani kërkon që qeveria të tërheqë rregullat e reja që heqin përfaqësimin ligjor, duke thënë se kjo është një përshtatje me nivelin minimal të Bashkimit Evropian.

Në të njëjtën kohë, Shoqata u bën thirrje anëtarëve të saj që të refuzojnë këto detyra të reja dhe të mos marrin pjesë në dhënien e këshillimit juridik sipas rregullave të reja.

Burimi:Ekot/Aftonbladet

Link: https://www.aftonbladet.se/nyheter/a/bOq03e/advokater-uppmanas-bojkotta-rattslig-radgivning