OKB-ja pranon kërkesën e Suedisë: Do të bëhet më e lehtë dëbimi i përdhunuesve të huaj

Shumë qytetarë në Suedi janë prekur nga historia e Meya Åberg. Ajo u bë simbol i një problemi që ka shkaktuar debat të madh në vend. Personi që e përdhunoi u dënua me burg, por nuk u dëbua nga Suedia, sepse kishte status refugjati. Sipas qeverisë suedeze, ky nuk është rasti i vetëm. Edhe shtetas të tjerë të huaj të dënuar për krime të rënda seksuale kanë mbetur në Suedi për shkak të rregullave në fuqi.

Partia Moderaterna deklaron se siguria e Suedisë dhe mbrojtja e qytetarëve janë përparësia kryesore. Sipas saj, dhuna ndaj grave duhet të luftohet me të njëjtën forcë si krimi i organizuar. Për këtë arsye, qeveria ka ashpërsuar dënimet për krimet seksuale dhe ka vendosur masën e paraburgimit të sigurisë, e cila u mundëson autoriteteve të mbajnë të izoluar për një kohë të pacaktuar përdhunuesit që konsiderohen të rrezikshëm. Moderaterna propozon gjithashtu dyfishimin e dënimeve për burrat që ushtrojnë dhunë ndaj grave, me arsyetimin se personat e rrezikshëm duhet të qëndrojnë në burg, në mënyrë që gratë të jetojnë të sigurta.

Qeveria thekson se një pjesë e autorëve të krimeve të rënda seksuale ndaj vajzave dhe grave janë persona që kanë emigruar në Suedi. Sipas saj, këto krime dëmtojnë jo vetëm viktimat, por edhe shumë njerëz me prejardhje të huaj që punojnë, respektojnë ligjin dhe kontribuojnë në shoqërinë suedeze. Për këtë arsye, qeveria po vendos rregullat më të ashpra në vendet nordike për dëbimin e të huajve që kryejnë krime dhe po forcon kërkesat për sjellje të ndershme për marrjen e shtetësisë dhe të lejes së qëndrimit.

Moderaterna kritikon qeveritë e mëparshme socialdemokrate, duke thënë se për vite të tëra folën për luftën kundër dhunës ndaj grave, por nuk ndryshuan ligjet. Sipas partisë, ligjet e mëparshme bënë që vetëm 3 për qind e shtetasve të huaj të dënuar për krime të dëboheshin nga Suedia.

Rasti i Meya Åberg, sipas Moderaterna-s, tregon qartë se nevojiten ndryshime të tjera. Edhe pse autori u dënua me burg për përdhunim, ai nuk u dëbua sepse kishte status refugjati. Sipas ligjit, një refugjat mund të dëbohet vetëm nëse krimi konsiderohet jashtëzakonisht i rëndë. Gjykata e Apelit e cilësoi veprën si shumë serioze, por jo në atë nivel që lejonte dëbimin.

Një rast i ngjashëm kishte ndodhur edhe në vitin 2017. Një shtetas nga Afganistani u dënua për përdhunimin e një vajze 16-vjeçare, por edhe ai nuk u dëbua nga Suedia, pasi gëzonte statusin e refugjatit.

Sipas qeverisë suedeze, gjykatat zbatojnë ligjet suedeze dhe njëkohësisht rregullat ndërkombëtare. Në këto raste, gjykatat janë mbështetur edhe në udhëzimet e Agjencisë së Kombeve të Bashkuara për Refugjatët (UNHCR), të cilat në disa pjesë janë hartuar disa dekada më parë dhe shërbejnë për interpretimin e Konventës për Refugjatët. Për këtë arsye, qeveria thekson se nuk kritikon gjykatat, por beson se kur ligjet sjellin rezultate që qytetarët i konsiderojnë të padrejta ose të paarsyeshme, ato duhet të ndryshohen.

Për këtë arsye, qeveria suedeze mori iniciativën që më herët gjatë këtij viti të kërkojë ndryshimin e interpretimit të këtyre rregullave. Çështja u diskutua me Agjencinë e OKB-së për Refugjatët dhe me vende të tjera që mbështesin të njëjtin qëndrim.

Sipas Moderaterna-s, përpjekjet e Suedisë kanë dhënë rezultat. OKB-ja për Refugjatët ka njoftuar se pranon kërkesën e Suedisë për ndryshim. Kjo do të thotë se në të ardhmen do të jetë më e lehtë të dëbohen shtetasit e huaj të dënuar për përdhunime dhe krime të tjera të rënda seksuale, edhe nëse ata kanë status refugjati.

Në përfundim, Moderaterna thekson se kushdo që vjen në Suedi dhe kryen krime të rënda seksuale nuk duhet të ketë të drejtë të qëndrojë në vend. Sipas partisë, me kryerjen e këtyre krimeve autorët kanë zgjedhur vetë të humbasin të drejtën për të jetuar në Suedi. Gjithashtu, partia vlerëson se guximi i Meya Åberg për të treguar historinë e saj ka ndihmuar në nxitjen e këtyre ndryshimeve dhe në përpjekjet për t’u dhënë drejtësi të gjitha grave dhe vajzave që kanë qenë viktima të krimeve seksuale.

Artikulli është shkruajtur nga Kryeministri Ulf Kristersson dhe Ministri i Emigracionit Johan Forssell

Burimi: Aftonbladet

Link: https://www.aftonbladet.se/debatt/a/M7E4rm/fn-s-flyktingorgan-har-horsammat-vart-krav