SMHI paralajmëron për mungesë uji, preken 11 qarqe në Suedi.

Instituti Meteorologjik dhe Hidrologjik i Suedisë (SMHI) ka zgjeruar paralajmërimin për rrezikun e mungesës së ujit. Tashmë paralajmërimi përfshin edhe rezervat e ujërave nëntokësore në qarqet Halland, Östergötland, Stockholm dhe Uppsala.

Me këtë zgjerim, gjithsej 11 qarqe në Suedi janë të prekura nga rreziku i mungesës së ujit, tha hidrologu kujdestar i SMHI-së, Hugo Rudebeck.

Sipas tij, reshjet e shiut gjatë verës mund ta rrisin përkohësisht lagështinë e tokës dhe t’i ndihmojnë bimët të rimëkëmben. Megjithatë, për të rimbushur liqenet, lumenjtë dhe rezervat e ujërave nëntokësore nevojiten reshje shumë më të mëdha.

Një nga arsyet kryesore të kësaj situate është se gjatë dimrit dhe pranverës ka rënë më pak shi se zakonisht. Si pasojë, niveli i ujërave nëntokësore ka rënë ndjeshëm, raportojnë mediat suedeze.

Autoritetet u bëjnë thirrje të gjitha familjeve që ta përdorin ujin me kujdes dhe kursim. Banorët këshillohen gjithashtu të ndjekin njoftimet e komunës ku jetojnë, për t’u informuar nëse do të vendosen rekomandime ose kufizime të reja për përdorimin e ujit.

Burimi:SMHI/SVT

Link: https://www.smhi.se/nyheter/nyheter/2026-07-08-fortsatt-risk-for-vattenbrist-nu-omfattas-11-lan

https://www.svt.se/nyheter/lokalt/stockholm/smhi-varnar-for-vattenbrist-i-stockholm