Rregulla të reja për lejet e punës në Suedi. Mund të hyjnë në fuqi nga 1 shkurti 2027

Qeveria suedeze dëshiron ta bëjë më të lehtë për personat me leje pune në Suedi që të ndryshojnë vendin e punës. Për këtë arsye, ajo ka propozuar ndryshime në ligj, të cilat, nëse miratohen, mund të hyjnë në fuqi më 1 shkurt 2027.

Sot, një leje pune në Suedi është e lidhur me një punëdhënës të caktuar dhe me një lloj të caktuar pune. Kjo do të thotë se në disa raste, një person që dëshiron të ndryshojë punëdhënësin duhet të aplikojë për një leje të re pune.

Me propozimin e ri, qeveria synon ta ndryshojë këtë sistem. Në një projektligj të dërguar për shqyrtim në Këshillin Legjislativ (Lagrådet), propozohet që leja e punës të mos lidhet më me një punëdhënës të caktuar dhe as me një lloj të caktuar pune.

Çfarë do të ndryshojë?

Sipas propozimit, personat që kanë një leje pune nuk do të kenë më nevojë të aplikojnë për një leje të re vetëm sepse ndryshojnë punëdhënësin.

Megjithatë, ata do të kenë detyrimin të njoftojnë Migrationsverket sa herë që përfundon një marrëdhënie pune dhe kur fillojnë një punë të re.

Një tjetër ndryshim ka të bëjë me personat që mbeten pa punë.

Ata që kanë pasur leje pune në Suedi për më shumë se dy vjet do të mund të përfitojnë një periudhë më të gjatë tranzicioni për të gjetur një punë të re. Sipas propozimit të qeverisë, kjo periudhë mund të zgjasë deri në gjashtë muaj.

Pse dëshiron qeveria t’i ndryshojë rregullat?

Qeveria thotë se këto ndryshime synojnë të ulin burokracinë dhe procedurat e panevojshme, si për kompanitë ashtu edhe për personat që vijnë në Suedi për të punuar.

Ministri i Migracionit, Johan Forssell, në një njoftim për media tha se synimi është që Suedia të bëhet vendi më i mirë në Bashkimin Evropian për të tërhequr talente dhe ekspertë ndërkombëtarë.

“Unë dua që Suedia të bëhet më e mira në Bashkimin Evropian për tërheqjen e talenteve dhe ekspertëve ndërkombëtarë. Prandaj po punojmë në disa drejtime për të ulur burokracinë dhe rregullat e panevojshme. Propozimet e reja ligjore do t’i bëjnë proceset më të thjeshta dhe më të parashikueshme si për kompanitë, ashtu edhe për individët”, tha ai.

Kur mund të hyjnë në fuqi ndryshimet?

Qeveria propozon që ndryshimet në ligj të hyjnë në fuqi më 1 shkurt 2027.

Propozimet përfshijnë gjithashtu zbatimin e një direktive të re të Bashkimit Evropian, e cila parashikon një procedurë të përbashkët aplikimi për shtetasit e vendeve jashtë BE-së që dëshirojnë të jetojnë dhe të punojnë në një shtet anëtar.

Çfarë propozon qeveria?

• Leja e punës nuk do të lidhet më me një punëdhënës të caktuar dhe me një lloj të caktuar pune.
• Personat me leje pune nuk do të kenë më nevojë të aplikojnë për një leje të re kur ndryshojnë punëdhënësin.
• Kush përfundon ose fillon një punë të re do të duhet ta njoftojë Migrationsverket.
• Personat që kanë pasur leje pune për më shumë se dy vjet do të mund të kenë deri në gjashtë muaj periudhë tranzicioni në rast papunësie.
• Nëse miratohen, ndryshimet ligjore do të hyjnë në fuqi më 1 shkurt 2027.

Burimi: Nyheter24/Qeveria suedeze.

Link:https://nyheter24.se/nyheter/inrikes/1497365-nya-regler-for-arbetstillstand-kan-inforas-1-februari-2027