IVF falas do të vazhdojë edhe në vitin 2027. Qeveria suedeze e bën investimin të përhershëm

Qeveria suedeze ka konfirmuar se mbështetja për trajtimet e fekondimit in vitro (IVF) nuk do të përfundojë në fund të vitit 2026. Programi me tre tentativa shtesë falas do të vazhdojë edhe gjatë vitit 2027.

Në pranverë, qeveria suedeze vendosi të investojë për t’u dhënë më shumë njerëzve mundësinë të bëhen prindër përmes IVF-së. Në këtë nismë marrin pjesë qeveria dhe Demokratët e Suedisë (SD).

Ministrja e Shëndetësisë, Elisabet Lann (KD), ministrja e Financave, Elisabeth Svantesson (M) dhe ministrja e Barazisë Gjinore, Nina Larsson (L) njoftuan se në buxhetin e rishikuar të pranverës janë ndarë 327 milionë korona suedeze për të financuar tre tentativa shtesë falas të IVF-së.

Sipas tyre, kjo është një masë e rëndësishme, pasi studimet tregojnë se mundësia për një shtatzëni të suksesshme rritet kur një çift ka mundësi të kryejë më shumë tentativa.

Kishte shqetësime për afatin

Fillimisht, fondet ishin parashikuar vetëm për vitin 2026. Megjithatë, shumë mjekë dhe pacientë shprehën shqetësimin se ishte e vështirë të përfundonin tre tentativa shtesë para fundit të vitit.

Pas këtyre kritikave, ministrja e Shëndetësisë bëri të ditur se programi nuk do të ndalet në fund të vitit, por do të vazhdojë edhe gjatë vitit 2027.

“Ky investim është i përhershëm dhe do të vazhdojë edhe në të ardhmen. Qëllimi është t’u japim më shumë çifteve mundësinë të realizojnë ëndrrën për të pasur një fëmijë”, tha Elisabet Lann për radion suedeze.

Vendimi mund të ndryshohet nga një qeveri e re

Megjithëse qeveria aktuale e konsideron këtë një investim të përhershëm, ministrja sqaroi se një qeveri e re, pas zgjedhjeve, mund të vendosë ta ndryshojë këtë politikë.

“Nëse dikush dëshiron ta heqë këtë masë, duhet të marrë një vendim të ri për ta ndërprerë. Çdo qeveri mund ta bëjë këtë, por për qeverinë tonë vendimi mbetet në fuqi”, u shpreh ajo.

Rreth një në gjashtë çifte preken nga infertiliteti

Sipas qeverisë suedeze, rreth një në gjashtë çifte në Suedi përballen me infertilitet. Kjo sjell jo vetëm sfida mjekësore, por edhe vështirësi psikologjike dhe sociale.

Një trajtim IVF kushton mesatarisht deri në 50 mijë krona suedeze, sipas regjistrit kombëtar të cilësisë. Për këtë arsye, qeveria thekson se dëshira për të pasur një fëmijë nuk duhet të varet nga mundësitë financiare të familjeve.

Link: https://marcusoscarsson.se/kommer-vara-gratis-efter-arsskiftet-storsatsning-fran-regeringen/