Analiza: Bllokada politike mes C dhe V: “Është mjaft e turpshme”

Bllokada politike mes Partisë së Qendrës (C) dhe Partisë së Majtë (V) ishte e njohur që para zgjedhjeve, por pavarësisht kësaj, askush nuk bëri diçka për ta zgjidhur problemin.

Kështu thotë Viktor Barth-Kron, komentator politik i gazetës Expressen, gjatë një diskutimi në emisionin Agenda të SVT-së.

Sipas tij, situata është e vështirë për t’u shpjeguar, sidomos për njerëzit që nuk e njohin politikën suedeze.

“Besoj se është mjaft e vështirë t’ia shpjegosh dikujt që vjen nga një planet tjetër, ose thjesht nga një vend tjetër në Evropë, se cili është në të vërtetë problemi. Por problem është. Dhe, sinqerisht, është mjaft e turpshme”, tha Barth-Kron.

Ai mendon se në fund Partia e Qendrës, C, me shumë gjasa do të tërhiqet dhe do të bëjë një hap prapa për të zgjidhur situatën.

Socialdemokratët po përpiqen të dobësojnë partnerët

Edhe My Rohwedder, komentatore politike e Aftonbladet, e sheh situatën si të komplikuar.

Sipas saj, strategjia e Socialdemokratëve është që gradualisht t’i lodhin dhe t’i dobësojnë partitë me të cilat synojnë të bashkëpunojnë.

Rohwedder thotë se, pavarësisht vështirësive, që Socialdemokratët të mos arrijnë të formojnë një qeveri dhe të “humbasin pushtetin qeverisës” do të ishte një dështim i madh.

Andersson mund të synojë një qeveri më të vogël

My Rohwedder beson se liderja e Socialdemokratëve, Magdalena Andersson, mund të synojë krijimin e një qeverie të drejtuar nga Socialdemokratët, por me më pak parti se sa një koalicion me katër parti.

Sipas saj, Andersson ka gjasa të përpiqet ta zgjidhë situatën dhe të gjejë një marrëveshje.

“Besoj se ajo do të arrijë ta zgjidhë disi, sepse përndryshe do të ishte një humbje kaq e jashtëzakonshme”, tha Rohwedder.

Në qendër të problemit është pikërisht mosmarrëveshja mes Centerpartiet (C) dhe Vänsterpartiet (V), dy parti që janë të rëndësishme për krijimin e një baze të qëndrueshme parlamentare për një qeveri të udhëhequr nga Magdalena Andersson.

Burimi: Stvplay/Expressen/GP/Aftonbladet

Link: https://www.svtplay.se/video/84dnkDZ/agenda/chicken-race?position=260

https://www.expressen.se/nyheter/politik/har-ar-nyckelpersonerna-i-regeringsforhandlingarna/

https://www.gp.se/politik/moderaternas-hopp-for-makten-vinna-over-c.55738ec0-6915-472a-989d-ea4a0061da77

https://www.aftonbladet.se/nyheter/a/K84KbG/experten-om-magdalena-anderssons-regeringsalternativ