Çmimet e apartamenteve rriten sërish në Suedi

Çmimet e apartamenteve në Suedi janë rritur sërish në muajin shtator. Rritja vjen pasi çmimet kishin rënë për tre muaj radhazi.

Në të njëjtën kohë, çmimet e shtëpive dhe vilave ranë pak në shtator, pas shtatë muajsh rritjeje të vazhdueshme. Të dhënat e reja janë publikuar nga Svensk Mäklarstatistik, organizata që ndjek zhvillimin e çmimeve të banesave në Suedi.

Në të gjithë vendin, çmimet e apartamenteve u rritën me 1,6% gjatë shtatorit. Ndërsa çmimet e vilave ranë me 0,4%.

Nëse krahasohet situata me një vit më parë, apartamentet janë tani 5,4% më të shtrenjta. Çmimet e vilave janë rritur me gati 4% gjatë së njëjtës periudhë.

Edhe numri i shitjeve të banesave vazhdoi të rritet. Numri i transaksioneve u rrit nga niveli rekord që ishte shënuar në muajin e kaluar.

Sipas Mäklarsamfundet, tregu i banesave në Suedi po tregon shenja të mira. Në sondazhin tremujor që organizata zhvillon me anëtarët e saj, shumë prej tyre e përshkruajnë tregun si një treg me kërkesë të mirë.

Ata thonë gjithashtu se tregu duket më i parashikueshëm se sa ka qenë prej kohësh, edhe pse vazhdon të ketë pasiguri për mënyrën se si do të zhvillohen normat e interesit në të ardhmen.

“Në sondazhin tonë tremujor me anëtarët, krijohet një pamje e një tregu me kërkesë të mirë, i cili perceptohet si më i parashikueshëm se prej kohësh, pavarësisht pasigurisë për normat e interesit në të ardhmen”, thotë Oskar Öholm, drejtori ekzekutiv i Mäklarsamfundet, në një komunikatë për shtyp.

Shifrat e Svensk Mäklarstatistik, shkurt

Në të gjithë Suedinë:

• Apartamentet: +1,6%
• Vilat: −0,4%

Stokholm i Madh (Storstockholm):

• Apartamentet: +2,0%
• Vilat: −0,6%

Goteborgu i Madh (Storgöteborg):

• Apartamentet: +1,2%
• Vilat: +1,6%

Malmo e Madhe (Stormalmö):

• Apartamentet: −1,4%
• Vilat: +0,9%

Ndryshimet janë mujore, pra krahasojnë muajin shtator me muajin gusht.

Burimi: Maklarstatistik

Link:https://www.maklarstatistik.se/pressmeddelanden/okande-priser-pa-bostadsratter-medan-villor-minskade-nagot-i-september/