Gjithnjë e më pak suedezë shqetësohen për kriminalitetin

Për herë të parë në dhjetë vitet e fundit, shqetësimi i qytetarëve suedezë për kriminalitetin ka rënë ndjeshëm. Sipas një ankete të re, përqindja e personave që shqetësohen për krimet në shoqëri ka zbritur nga 54 në 45%.

Gjithnjë e më pak suedezë janë të shqetësuar për kriminalitetin në shoqëri. Këtë e tregon anketa e madhe për sigurinë, e realizuar nga Këshilli Suedez për Parandalimin e Kriminalitetit (Brå).

Sipas këtij institucioni, kjo është hera e parë në dhjetë vitet e fundit që regjistrohet një rënie kaq e madhe e shqetësimit të qytetarëve për kriminalitetin.

Gjatë dhjetë viteve të fundit, përqindja e suedezëve që shqetësoheshin për kriminalitetin në shoqëri ishte rritur vazhdimisht, nga 28% në 54%. Megjithatë, rezultatet e anketës së këtij viti tregojnë se kjo shifër ka rënë në 45%.

Åsa Strid, zëvendësdrejtuese e një njësie pranë Këshillit Suedez për Parandalimin e Kriminalitetit, thotë se institucioni nuk ka regjistruar më parë një rënie kaq të madhe brenda një viti.

“Ne e kemi realizuar këtë anketë prej njëzet vitesh dhe nuk kemi parë kurrë një rënie të tillë nga një vit në tjetrin. Kjo ndodh pas një periudhe dhjetëvjeçare, gjatë së cilës shqetësimi për kriminalitetin në shoqëri është rritur vazhdimisht”, shprehet Åsa Strid.

Anketa nuk jep një përgjigje të qartë se përse është ulur shqetësimi i qytetarëve për kriminalitetin. Megjithatë, Åsa Strid beson se një nga arsyet mund të jetë pakësimi i krimeve të rënda.

Sipas saj, rënia e rasteve të shpërthimeve me lëndë plasëse dhe e vrasjeve me armë zjarri mund të ketë ndikuar që qytetarët të ndihen më pak të shqetësuar për kriminalitetin në shoqëri.

Edhe pse rezultatet tregojnë një rënie të ndjeshme të shqetësimit, anketa nuk përcakton me siguri se cilët faktorë e kanë shkaktuar këtë ndryshim.

Burimi:BRA

Link: https://bra.se/statistik/statistik-fran-enkatundersokningar/nationella-trygghetsundersokningen