SMHI paralajmëron për erëra të fuqishme stuhie në Suedi: “Situatë e rrezikshme e motit”

E diela pritet të sjellë erëra të forta në disa pjesë të Suedisë. Instituti Suedez i Meteorologjisë dhe Hidrologjisë (SMHI) ka lëshuar një paralajmërim të verdhë për motin, pasi stuhia Boelo pritet të përfshijë vendin.

Sipas SMHI-së, moti të dielën mund të jetë me stuhi tl fuqishme, veçanërisht përgjatë bregdetit jugor të Suedisë. Paralajmërimi përfshin të gjithë zonën bregdetare nga Stokholmi deri në Goteborg, si dhe ishullin Gotland.

Në disa zona, rafalet e erës mund të kalojnë 24 metra në sekondë. Këto erëra të fuqishme mund të shkaktojnë probleme, pasi ekziston rreziku që sendet e lëna jashtë të merren nga era dhe të fluturojnë larg.

Meteorologia e televizionit TV4, Madeleine Westin, paralajmëron se situata mund të bëhet e rrezikshme.

“Kjo mund të krijojë një situatë mjaft të rrezikshme të motit”, thotë ajo.

Paralajmërimi i verdhë do të jetë në fuqi të dielën, nga ora 08:00 e mëngjesit deri në orën 18:00 të pasdites.

Megjithatë, moti i keq nuk do të kufizohet vetëm në zonat e përfshira në paralajmërim. Edhe në pjesët e tjera të vendit, jashtë zonave të shënuara me të verdhë, mund të ketë erëra të forta dhe reshje shiu, shkruan SVT Sörmland.

Autoritetet paralajmërojnë për një ditë me mot të vështirë, ndërsa stuhia Boelo pritet të sjellë erëra të fuqishme në disa pjesë të Suedisë.

Burimi: SMHI/SVT/TV4

Link: https://www.smhi.se/vader/prognoser-och-varningar/varningar-och-meddelanden/varningar

https://www.svt.se/nyheter/lokalt/sormland/mycket-harda-vindbyar-och-regn-vantas-till-helgen-smhi-varnar

https://www.tv4.se/artikel/mJOSJL1UWWvrsSFt3rbzz/da-slar-stormen-boelo-till-mot-sverige-kan-bli-ganska-farligt-laege