Riksbanken pritet të rrisë ndjeshëm normën e interesit gjatë vitit të ardhshëm

Banka Qendrore e Suedisë (Riksbanken) pritet të nisë një periudhë të re të rritjes së normave të interesit. Të mërkurën, norma bazë e interesit pritet të rritet nga 1,75 në 2%. Kjo do të ishte rritja e parë pas më shumë se dy vitesh. Sipas parashikimeve të tregut, rritjet mund të vazhdojnë edhe gjatë 12 muajve të ardhshëm.

Pas më shumë se dy vitesh pa rritje, Riksbanken pritet të marrë vendimin për të rritur normën bazë të interesit me 0,25 pikë përqindjeje, duke e çuar atë nga 1,75 në 2%.

Megjithatë, kjo rritje mund të jetë vetëm fillimi i një periudhe më të gjatë me interesa më të larta në Suedi.

Sipas bankës së madhe suedeze SEB, tregjet financiare parashikojnë se Riksbanken mund ta rrisë normën bazë të interesit me gjithsej 1,11 pikë përqindjeje gjatë vitit të ardhshëm.

Amanda Sundström, strategjiste në bankën SEB, shpjegon se Riksbanken duhet të afrohet me nivelin e normave të interesit që kanë vendosur bankat e tjera qendrore.

“Riksbanken duhet, si të thuash, të arrijë nivelin e të tjerëve”, deklaroi Sundström për agjencinë suedeze të lajmeve TT.

Suedia ka interesa më të ulëta se shumë vende të tjera

Një nga arsyet që mund të ndikojë në vendimet e ardhshme të Riksbanken është diferenca mes normave të interesit në Suedi dhe atyre në vendet e tjera.

Shumë banka qendrore, përfshirë ato të Shteteve të Bashkuara, Eurozonës dhe Norvegjisë, tashmë kanë norma bazë interesi dukshëm më të larta se Suedia.

Për këtë arsye, tregjet presin që edhe Banka Qendrore e Suedisë të vazhdojë me rritjen e interesave për t’u afruar me nivelin e bankave të tjera qendrore.

Nëse këto parashikime realizohen, suedezët mund të përballen me interesa më të larta gjatë vitit të ardhshëm, çka mund të ndikojë edhe në kostot e kredive dhe të familjeve që kanë kredi për banesa.

Burimi: TT/Omni/ DI

Link: https://tt.omni.se/riksbanken-antas-hoja-mest-i-vast/a/eG94wO

https://www.di.se/analys/het-inflationssignal-till-riksbanken/