Lajme

Suedia: Sezoni i gripit ka nisur më herët se zakonisht, autoritetet bëjnë thirrje për vaksinim

todayNovember 19, 2026 10

Background
share close

Sezoni i gripit ka nisur në Suedi më herët se zakonisht këtë vit. Lajmi është bërë i ditur nga Agjencia Suedeze e Shëndetit Publik (FHM), përmes një komunikate për shtyp.

Sipas autoriteteve shëndetësore, nëse gripi vazhdon të përhapet me këtë ritëm, numri më i madh i të prekurve mund të regjistrohet gjatë festave të Krishtlindjeve dhe në periudhën e ndërrimit të viteve.

“Këtë vit sezoni i gripit ka nisur herët. Në raste të tilla, kulmi i përhapjes zakonisht ndodh gjatë festave të Krishtlindjeve dhe rreth ndërrimit të viteve, por mbetet të shohim se si do të zhvillohet situata”, thotë Anders Johansson, epidemiologu shtetëror.

Aktualisht, më i përhapuri është gripi i tipit A. Sipas Johansson, një variant i ri i virusit mund të ketë ndikuar në fillimin e hershëm të sezonit të gripit.

Ndërkohë, autoritetet shëndetësore bëjnë të ditur se po rritet edhe numri i rasteve të infektimit me COVID-19.

Agjencia e Shëndetit Publik rekomandon vaksinimin kundër gripit për të gjithë personat mbi 65 vjeç, si dhe për personat më të rinj që bëjnë pjesë në grupet e rrezikuara. Në këtë kategori përfshihen edhe gratë shtatzëna.

Sa i përket COVID-19, vaksinimi rekomandohet për personat mbi 75 vjeç, si dhe për ata mbi 50 vjeç që kanë sistem imunitar të dobësuar ose që bëjnë pjesë në grupet e rrezikuara.

Autoritetet u bëjnë thirrje veçanërisht personave që bëjnë pjesë në këto kategori të ndjekin rekomandimet për vaksinim, për të mbrojtur shëndetin e tyre gjatë sezonit të gripit dhe përhapjes së COVID-19.

Burimi:Folkhalsomyndigheten

Link: https://www.folkhalsomyndigheten.se/nyheter-och-press/nyhetsarkiv/2026/november/tidig-influensasasong-i-ar/

Written by: admin

Rate it

Rreth Nesh

Scandinavian-Albania-Radio është radio më e re në hapsirën mediatike Skandinave dhe konkretisht në Suedi me vendndodhje në adresën: Industrigatan 44a 57138 Nassjo.

contact us

Shkarko APP